İron, dınyo 10 qılə turizmi vey çokə kişvəron miyonədə

Pars Tudey- İroni dasti sənaye, turizm və mədəni irson muavin votışe: İron dınyo 113 qılə saytədə de 30 qılə əsəri ğeyd kardey, beynəlxalğ irson siyohiədə əsəron ğeyd kardey cəhəto, dınyo 10 qılə turizmi vey çokə kişvəron miyonədə ğərorış qəte və hiss nıkardəninə irson baxşədə həm dınyo 4 qılə iminnə kişvəronku şomil beydə.

Bə Pars Tudey raporti əsos ki Tele-Rədyoku nəğlış karde, Əli Darabi votışe: İron qıləy sərzəmine ki 7 həzo sornə torixi kanəti soybe və təğribən 1 milyon torixi əsər və obyekt bəvədə mıvcude iyən tosə ısət 43 həzo əsər həm ğeydış karde.Əv ijən əlovəş karde: torixi və mədəni əsəronku əlovə, İron hiss nıkardəninə irson baxşədə həm, hevujə zərfiyyəton soybe iyən ım baxşədə, İroni vırə ğeyd kardey, ım kişvəri muxtəlifə mədəni və nığıləti nışonəy.Əv bə 17 milyon turisti rəsey, İroni hədəf zınəşe və votışe: həminə hədəfi bə vırə rəseyro lozimə strukturon hozzo kardey və turizmi zərfiyyəton zıney zərurie.