Pezeşkiyan votəşe: həmzəman hucum və sanksiya de muzakirə idda fəribkarətiye
Bə Pars Tudey xəbəron əsosi İron İslom Respublika prezdent Amerkə bə ironi zid hərəkətonku işorə kardeədə votəşe: həmzəman hucum və sanksiya de muzakirə idda fəribkarətiku qıləy nımonəy.
Bə telerədyo aqentəti nəğli əsosi Pars Tudey xəbəş doə İron İslom Respublika prezdent Məsud Pezeşkiyan 2 şanbə ruji de ermənistanı xarici koon və beynəlxalğə ticarət vəziri Ararat Mirzoyan vindımonədə 2 qılə məmləkəti miyonədə bə çok və dustə rabitə işorə kardeədə ommidvarətiş kardə ım mınosibəton həmmə baxşonədə nakonəsə ve inkişof bıkən.İron İslom Respublika prezdent , ermənion de İron ve çokə təcrubəonku işorə kardeədə votışe: ermənion ironədə həmmişə xoş nom iyən durustkarə insononku zıniyə bedən və ım çokə təcrubə 2 qılə milləti miyonədə bıə əlağon erjinə sərmayəonkuy.Pezeşkiyan ıştə sıxanon coqlə baxşədə bə məntəğə tojə hadisəon işorə kardeədə ısətnə həssosə şərayetəndə votəşe: çəmə problem de Amerkə ıme ki ha kərə bə muzakirə nıştimon dərhal bə çəmə zid canqi bino kardedə tosə ısət3 kərə votımon karde bəpeştə bəmə hucumış bardə və ım nışon dodə kiəvon votımon karde domoədə nin , bəlkə çəvon hədəf İron İslom Respublika nizomi miyono bardeye.əv əlovəş kardə İron İslom Respublika çandə kərə atom fəaliyyəton cəhətədə ıştə rustiyətiş nışon doə və beynəlxalğ atom enerji təşkilati həmməysə veyə nəzorət bə çəmə məmləkəti aid bə, jıqo qıləy holədə Amerkə de duə iddaon ironi de təziğon dim bə dim kardə.İron İslom Respublika prezdent dəvomədə votışe: İ bə milləton təşkilatədə ıştə nıtğədə elonım karde ki atom fəaliyəton baxşədə votımon və həğiğəti ruşin kardeyu hozzı hestimon əmmo problem bımədəy ki ha kərə nəzorətçion bə İron omin , çəmə atom mərkəzon və alimon şınasayi bin və çəy bəpeştə mərkəzon bombardımon və çəmə alimon terror bin.De kom qılə məntiğ çəmə elmiyə mərkəzon , ali məktəbon bəpe bombardımon bıbonIm qıləy şərayetədəy ki bə beynəlxalğə huğuğ və ğanuni əsosi həxışon ni beynəlxalğ atom enerji təşkilati nəzorəti jiyədə bə atom mərkəzon bombardımon bıkən.Pezeşkiyan Amerkə cinayətkarə hərəkətış bə İron hucum bardeyu və peşo muzakirə karde iddaş çəvon fəribkarətiku qıləy nımonəş zınə və əlovəş karde əvon cəvob dodə nin ki de kom qılə qıno Minabı 168 qılə məzlumə hırdənışon bə şəhodət rosniyə və xəcolət kəştə nin və həmçınan insonə həxon idiaşon heste.ə dınyo ki mədəniyə iddaş heste əmmo əmələdə vəhşi, ım çəmə imrujnə probleme.İron İslom Respublika prezdenti təkidış kardə çəvon heç qılə hərəkət və rəftor de İron de beynəlxalğə ğanun bərobər ni və əlovəş kardə ə deşmenonədə ki ha ruj terror, sanksiya və təhdid kardedə iyən əhd peymoni darıştedə muzakirə mənoş ni və çəmə millət həm jıqo siyasəti ğəbul kardedə nin.Ermənistanı xarici koon və beynəlxalğə ticarəti vəzir həm ım vindımonədə təkidış kardə İron və Ermənistanı dustiyəti və rabitə ruj bə ruj zumand bedə və votışe: beynəlxalğə səviyədə həm 2 qılə məmləkəti həmkoəti ve çok cəriyanədəy və sanksiyaon kənoədə de zumandəti ıştə həmkoətion de İron təğib kardəmon.əv həmçinin bə ermənistanı sulh tələb bıkə siyasəton təkid kardeədə votışe: ermənistan qıləy sulh tələb bıkə məmləkəte və sulhi bə nəticə rusne domoədəy, qıləy ro ki əlbətdə rohət ni.Ermənistanı xarici koon və beynəlxalğə ticarəti vəzir oxoədə votışe: fəaliyyət bəkamon təin kardə ro əsosədə 2 qılə məmləkəti həmkoətion nakonəsə ve inkişof bıdəmon.
