Qeneral Mayor Şərif: Fələstin çı islamiyə umməti cəhad və vəhdəti sirre.

İronədə Ğuds və intifozə təşkilati rəis votışe: ımruj har zəmoniku vey bə Ğudsi ozod karde hədəf nızimon.

Bə Sepah aqentiyəti raporti əsos Qeneral Mayor Rəməzan Şərif Tehronədə Ğuds və intifozə təşkilati 2 minə iclosədə ımsornə sori Ğuds beynəl xalğiyə ruji yolə aksiya bərnoməon həmohənq kardero məntəğədə hadisəonış mığovimət cəhbədə zumandəti amil zınəş be və əlovəş kardə: sərhəddonədə Suriyə və İraği hərbion bə yande rəse, məntəğədə Daeşi uzvon məğlubiyət və siyonist rejimi zindononədə Fələstinıjə məhbuson mığovimət və xorək nıharde ısət mığovimət cəhbə və Fələstini milləti rohiyəon zumandəti bois bıə.

Qeneral Mayor Şərif bə Ərəbiston iyən bəzi Ərəbiyə kişvəron tojə senariyo və de Ğətər rabitəon ləğv karde işorəş karde və votışe: ısət Ğətər İroni nizom və mığovimət cəhbə həğiğəton barədə vey oğo mandə boçi ki əvon çandə həğiğətonku oğo bıən.

Bo Ğuds beynəl xalğiyə ruji yolə aksiya dəvoniyəro iclosi cərəyonədə Əhli Beyti İsmət və Təharət(ə) beynəl xalğiyə icmo sədr həm təsdiğış kardə: siyonist rejim və Amerkə pidəşone Ərəbon və islamiyə kişvəron de Telaviv adiyə rabitəşon bıbu və məntəğədə çəvon dustə kişvəron səy və cəhd ıme.

Muhəmməd Həsən Əxtəri təkidış kardə: Telaviv və Vaşenqtoni siyasət islamiyə kişvəron miyono təfrəğə soxte heste ta bə çəvon əleyh məntəğədə hiç zumandə ğudrət və qrupi təşkil məbu.

Mubarək rujə manqi oxonə cumə ruje Ğuds beynəl xalğiyə ruji yolə aksiya bərpo bəbe.