Şəhidon ailəon cəmədə İroni Yolə Rəhbəri bəyonat.

İroni Yolə Rəhbər Həzrəte Ayətullah Xamenei zinə şəv i dastə bə hərəmi mudafiə əkə və sərhəddiyə Əsqərə şəhidon ailəon cəmədə təkidışon kardə: İroni islamiyə nizom de zumandəti və iğtidor ijən mığovimət kardedə və İroni millət bə deşmən silli bəjəne.

Ə Həzrət bə Amerkə rəsmion tojə deşmənçiyə hərəkəton işorəşon kardə və əvoni puç hisob karde kənoədə votışone: Amerkə rəsmi şəxson çı İroni islamiyə inğilabi bə səbarzəti rəse i minə rujiku İroni nizomi əvəz karde fikədə bıən əmmo əvon karde nibəznın bə İroni millət silli bıjənon bəlkəm ım İroni milləte ki bəvon silli bəjəne.

İroni Yolə Rəhbər həmmə saxt və çətinə deşmənətion sayədə bə İroni islamiyə nizomi dəvom peydo karde işorəşon kardə və votışone: Amerkə prezidenti ziyod tələbion qıləy tojə məsələ ni boçi ki İroni islamiyə nizom i minə rujiku muxtəlifə bevəcə planonış vində əmmo İroni deşmənon hiç ğələti nıkardəşone.

İroni Yolə Rəhbər təkidışon kardə: zəmoni ki İroni İslamiyə nizom qıləy tojə peresə do be əvon əy bırniye zındə nıbən ısət ki ım nizom qıləy dıjd və əzəmətinə rişə dorə do bıə.

Ə Həzrət bə Amerkə rəsmion tojə sıxənon İronədə islamiyə nizomi əvəz karde sahədə ko karde işorəşon kardə və xətobışon kardə ki: şımə dəvardə 38 sori mıddətədə çı faxt şımə İronədə nizomi əvəz karde pidəron nıbe əmmo həmişə şımə sə bə sığ qıniyə ijən çımi bəpeştə həm jəqo bəbe.

Həzrəte Ayətullah Xamenei çı Amerkə sepiyə bino tojə rəsmionış be təcrubə və tojə peres hisobışon kardə və əlovəşon kardə: Amerkə dıvlət İroni islamiyə inğilabi bə səbarzəti rəseku çın nizomi sağit karde həsrətədə bıən ijən çımiku bəpeştə həm de həminə orzo zəminədə dəfn bəben.

İroni Yolə Rəhbər kişvərədə ısətnə əmniyyəti çı hərəmi mudafiə əkə ijən sərhəddon mudafiə əkə şəhidon xuni bərəkətiku zınəşon bən ijən votışone: əqə bə nıbən çı hərəmi mudafiə əkə şəhidon, ısət bəbe əmə de fitnəkorə xəbis və bə Əhli Beyt(ə) deşmən bıə terroriston Tehronədə mubariz baredə bimon boçi ki çəvon ğəsd İraği sərhəddiku bə İron daxil be və İroni noəmn karde be əmmo ısət əvon İrağ və Suriyədə məhv bey holədən.