Ğıroni prizmaku jimoni məhorəton
Ğıroni prizmaku jimoni məhorəton
Iruj qıləy merdi marde vaxt ome rəse.ıştə zoş tələb karde və bəy voteşe:”ha çımı fərzənd ha!çımı mardey bəpeştə həmonə zəmin iyən boği bə fəğırə şəxson iyən yətimon baxşkəyş ta çımı axırəti roysə qıəly ruşnəko.
Joqo be ki,çı həmonə merdi cismi vəzyət çok be və əv işəv bə həmonə boği tərəf hərəkətış karde.ıştə zoəku həm tələbış karde ki,dumoku ruşnə pekəy ta əv ro bıvindo.çun çə merdi zoə ıştə pı peştono hərəkət kardedəbe,əve pı ro çok-çoki vindedənıbe.pı voteşe:!”tı çımı peştono hərəkət kardedəş,əve ruşnə bəçımı şıə ro kam dətıvedə.fəğət ıştı ro ruşnə kardedə. Zoə voteşe:çımı əzizə pı!ıştı mardey bədiqə kardə infağ həm jələvoniye.çə baxşi həm nurış bomı veyə foydəş heste,əmmo botı foydəş kame.çıro ki,dınyo həmonə infoğış ıştıkuş se bəmış əto karde.və tı qıləy çi baxşedəş ki,həni botı hiç qıləy foydəş ni və tı çəyku oko doey zıneydəniş.
Çoki əve ki,ıştə səloməti vaxti Xıdo royədə infoğ kardero,ıştə moliku istifodə kardey bızınoş və ım ko bətı qıləy ləzzət baxşko.Kərimə-Ğıron bə ım nuktə de qıləy ğəşənqə tərzi işorə kardedə.joqo ki,hamyedə:”ha imon vardə kəson ha! qıləy ruji rəsey bənav ki,nə həmonə ruji nə qıləy bıdə-bıstəni və nə dustəti iyən nə şəfoəti(foydəş nibəbe) çəmə bəşmə ruzi doə çiyonku infoğ(baxş)kənən.(bəğərə-254)...
Ibodət har qıləy formədə həm bıbu,bə insoni psixi səloməti koməq bedə və həmonə ibodəti bə vırə rosney ovandəti pəydu kardey,jimoni məhorətonkuye.bardə bıə təhğiğaton nışon doydə ki,dini rəftoron bə insoni ruhi cəhəto ozavziye koməq kardedə.ımruj psixoloji mutaliyəon həm bə ım nəticə rəsən ki,bə insoni daxili rohətəti boyis bıə kali koon bə vıər rosney,insonədə ğəlbi rizoyəti hissi icod kardedə iyən çəy bəştə etımod kardey ğıvvə zumand kardedə.”infoğ iyən bə cokəson ıştə moliku baxş kardey” min cumlə çın koonkuye ki,ehanə de ğəlbən və de insoni dıli meyli əncom doey bıbu,həm bə insoni ruhi səlomətəti təsir noydə və həmən ım ko seyr kardə qıləy bə camiyə co şəxson.koməqəkə şəəxs deştə ım ko bəştə etımod kardey ğıvvə iyən ğəlbi rizoyəti mısbətə təsir noydə və həmən camiyədə həmdıləti iyən həmdardi ruhiyyə rəvoc doydə.
Umumən bə cokəson dardi dəvo kardey,bə insonon ruhi səloməti boyis bıə eşği təmin kardə mənbəonkuye.qıləy zəmon ki,şımə bə ikəsi koməq kardedon və əv həm boşımə xeyə dıvo kardedə,şımə ıştə eşği xəzinə pur bıey royədə qıləy ğədəm şodeydon.əgər ım xəzinə təy bıbu,bəvədə bə ım insoni ruhi zəyfəti boyis bəbe...
Isət bəbe sıvolkəy ki,şımə vucudədə çanədə infoğ iyən baxşeşi ruhiyyə heste? Ayə bıə ki,şımə ıştə təam və xorəkon bə ikəsi doə və ıştən vəşyan mandəyon? Ya ıştə ehtiyocon bıə molonku bə qıləy ehtiyocinə şəxsi doəyone? Ayə zıneydon ki,ıştə moliku baxş kardey həmdıləti nımunəonku qıləyniye?həmdıləti vaxti şəxs kardey bəzıne ıştəni cokəson vırədə nəzədə bıqəto və çəvon nəzəku bə problemon erəxo və əvoni həlko.infoği zəmonədə qıləy şəxs ıştəku dəvardedə ta çı ozavziye ləzzəti bıçaşto.maddi baxşeşon bo səloməti səviyyə bəpe bardero iyən eqoistətiku dəvardero qıləy mısbətə ğədəme.çoko ki,həzrəte Fatimə(s) iyən çəy fərzəndon se ruj dumo yənde ıştə ehtiyocışon bıə xorəki bə mehtocon baxşeydən,Kərimə-Ğıron ım misliş nıbə və loyığinə ko tarif kardedə və həmmə kəsi nəzə bə ım nuktə cəlb kardeə ki,əvon qıləy holədə ki,dılışon hestebe ə xorəki ıştən bəhən,əmmo əvışon bə benəvo,yətim iyən əsirişon doe və ım koşon fəğət bo Xıdo xoto əncom doe iyən çımi mığobilədə hiç qıləy mıkofot iyən təşəkkurışon tələb nıkarde.(insan-8-9)...
Infoğ Xıdovəndi təklif doə ibodətonkuye.ım məfhum bənə xoms iyən zəkoti doey bıə vacibaton və bənə bə ehtiyocinə şəxson koməq kardey,yətimon təkrim kardey bıə mıstəhəbbiyə(səvobə) əməlon ğolibədə icro bedə.Ğıroni təlimonədə bo ıştə moliku dəvardeyro ziyoədə təşviğəkə siyosəton nəzədə qətey bıə.məsələn çanədə vey infoğ bə baxş bıbu,bə hərəbaxtəti boyis bəbe.Ali İmrani mıborəkə surə 92-ə ayədə omə:”bə çokəti (həyğəti) bəvəd bərəsiyon ki,şımə ıştə piyə çiyonku (Xıdo royədə) infoğkoyn iyən Xıdovənd şımə infoğ kardə çiyonku aqahe.