G20 qrupi sammit,Avropə iyən Amerikə miyono ixtilofon

G20 qrupi sammit,Avropə iyən Amerikə miyono ixtilofon

2017-ə Miladi sori iyuli 7 və 8 əynə iyən şanbə rujon Almaniyə Hamburqədə 20 qrupi uzv bıə kişvəron yolon sammit bərpo be.çın iclosi cərəyonədə Hamburqi şəhr de bə iyo cəm bıə məmləkəton yolon bardə ixtisodi siyosəton etırozəkəyon səhnə və meydoni təbdil bıəbe.co tərəfiku deməkə ki,dınyo dıjdə ixtisodi ğudrəton cəhd kardedəbin ıştə qrupi qıləy vahidə təşkiloti unvanədə nışon bıdəyn,əmmo çın sammiti oxoyədə ğiroət bıə bəyoniyyə nışonış doe ki,çın qrupi miyono veyə ixtilofon heste.joqo ki,Amerkə prezident Donald Tramp bə Ətrof Muhiti iyən ticorəti ayid bıə məsələonədə ixtilofinə nəzə bımi misol jıey bəbe.20 qrup çı 19 qılə məmləkət iyən Avropə İbemoniku iborəte.həmonə 19 qılə kişvər həm çımonku iborəte: Arqentinə,Avstraliyə,Braziliyə,Kanada,Çin,Fransa,Almaniyə,Hidıston,İndonaziyə,İtalyə,Yaponiyə,Meksikə,Rusiyə,Səudiyyə Ərəbıston,Cənubi Afrika,Cənubi Koreya,Tırkiyə,Britaniyə iyən Amerkə.çın vist qrupi əsliyə baxşi dınyo sənaye cəhəto inkişof kardə iyən dıjdə ixtisodışon bıə 8 qılə kişvəron təşkil doydə və co məmləkəton ğərəz Ərəbıston dınyo ixtisodədə nuperəsə kişvəronin.bın sammitədə bənə İspaniyə, Hollandiyə, Norveç,Ğəna,Vyetnam və Sinqapuri bıə kali kişvəron mehmoni unvanədə və çın qrupi əsliyə uzvonku iyən kə soyb Almaniyə həm iştirok kardedəbe.həmçinin Dınyo Ərzağ və Di Təsərrufati Təşkilot, Dınyo Bank,Dınyo Ticarət Təşkilot, Beynəlxalğ Valyuta Fond, Dınyo Səhiyyə Təşkiloti rəhbəron həm bə ın iclos dəvət bıəbin. G20-ədə umumən dınyo umum daxili məhsuli istehsoləkə ğudrəton 80 faiz,dınyo kişvəron milli umum daxili məhsuli istehsoləkə ğudrəti 85 faiz,Dınyo Ticorəti 80 faiz və çı dınyo cəmiyyəti seədə dı hissə təşkil doydə.bə Beynəlxalğ Valyuta Fondi məlumaton əsos,20 qrupi uzvon Miladi 2010-ə soriku de tobə 2016-ə sori dınyo umum daxili məhsuli istehsoli 84/1 təşkil doydəbe.bən qrupi əhəmiyyəti nəzə kardeyədə vindeəmon ki,2008-ə Miladi sori Vaşinqtoni sammiti bəpeştə,2009-ə sori çın qrupi lideron elanışon karde ki,ım qrup çı G7 əvəzi dınyo ixtisodi vey əsliyə sammiti unvanədə dınyo ixtisodi inkişofiro veyə rol ifo kardey bəzıne.həlbəttə,G20 qıləy rəsmiyə təşkiloti unvonədə bıəni və iyo ve vaxti çı dınyo muhimmə məsələon barədə mızokirəon bardey bıə.Vist qrupi qıləy dayimi buro iyən dəftərxonəş bıəni və kə soybə kişvər bo ın sammiti bərpo kardero,lozım bıə tədarukon vindedə.

Almaniyə Hamburqədə iyuli 8-ədə bıə G20 sammit de qıləy bəyoniyyə bə oxo rəse.bın bəyoniyyədə bənə Dınyo İğlimi əvəz bıey,ozodə ticorət və terrorizmi bıə mıxtəlifə məsələon işorə be.de G20 –I qırd ım bəyoniyyəon əmmo ijən iyo çı dınyo ixtisodi ğudrəton de Amerkə bıə Dınyo İğlimi,məxsusən bə Parisi mığovilə rioyət nıkardey barədə bıə ixtilof oşko bə çəş çiyedəbe.Alamniyə Kansler Angela Merkel çın konfransi oxoyədə bə çın qrupi uzvon rəhbəron həmməy ğərəz Amerkə bə Dınyo İğlimi mığovilə əməl kardey işorəş karde və elanış karde ki,ım oşkoeye ki,əmə bə qıləy komilə roziyəti nırəsimon.əy bəyonış karde: “çı vist qrupi rəsmiyə bəyoniyyə həm de çokə formə nışon doydə ki,ixtilofon movcude”. Almaniyə sədrı ə`zəm Merkel voteşe ki,mı de Britaniyə iminə vəziri qətə nəzə mıxolifim.joqo ki,Treza Mey votəşbe ki,Vaşinqton bə Parisi təvofuğnomə oqardey barədə bə ğərol ome bəzıne.Merkel eyni holədə  bə vist qrupi co uzvon ıştə təşəkkurış həm elanış karde və voteşe:”az bə co kişvər iyən hukuməton yolon bə Parisi mığovilə onıqardey xoto ıştə təşəkkuri bəyon kardedəm.”əv həmçinin elanış karde ki,bəbe iminə fırsətədə  ım mığovilə bə icro noey bıbu.Fransə prezident Emanuel Makron həm elanış karde ki,bə dınyo iğlimi əvəz bıey ayid bıə iclos ki,2017-ə Miladi sori dekabrədə bəbe,çın iclosi kə soybəti bəştə ohdə peqəto və cəhd bəkay Tramp bə ın mığovilə ilhoğ bıeyro səy bəkay.əy bə ın qrupi ixtilofon işorəş karde voteşe ki,çəmə dınyo hiçfaxti bın həddədə bə ixtililofi dıço bıənıbe.Trampi votəşe ki,Amerkə İbıə Ştaton dılış heste bə co məmləkəton koməqkəy ta bə sığ oqardə pokə vəşemonon oko bıdəyn.ım qıləy holədəy ki,Parisi İğlimi əvəz bıey mığovilədə təkid be ki,bənə sığə zevıl,ğaz iyən nati bıə bə sıği oqardə vəşemonon istifodə kardey tədrici surətədə bə oxo bıdəyn.”Avsrtaliyə ABC News”xəbə kanali siyosi redaksiyə heyəti rəyis Kris Yulmen  bın barədə nıvıştəşe:”Vist qrup qıləy holədə ıştə koş bə oxo rosne ki,ım qrup bə 19 qrupi təbdil bıəbe.zira çın iclosi oxoyədə həmmə bə Parisi Ətrof Muhiti ayid mığovilə təkid kardedəbe, əmmo Amerkə coyli mandə və təcrid bıəbe”.