Tehronədə bıə Astanə nomo iclosi oxonə bəyoniyə: Suriyə behroniro hərbi roon mevcud ni.
Tehroni iclosi oxonə bəyoniyədə İron, Rusiyə və Tırkiyə yolon təkidışon be ki Suriyə behroni de hərbi roon həl karde nibəbe, əvon de trrorizm mubarizə bardeyro bə həmkarion dəvomi təkid kardeşon iyən həminə koy barədə iştəniku ciddi irodəon nışo doşone.
Astanə nomo 3 tərəfi həmkarion dəvomi iyən çəy nəticə qarantiyaəkəyon 7 minnə iclos, de Tehroni mizbonəti və de İron, Rusiyə və Tırkiyə prezidenton iştiroki bərpo bıə.
Deşəmbə şəv, Tırkiyə prezident Rəcəb Təyyeb Ərdoğan və seşəmbə əsr Rusiyə prezident Veladimier Putin de Astanə nomo 3 tərəfi həmkarion dəvomi iyən çəy nəticə qarantiyaəkəyon iclosi iştiroki hədəf bə Tehron varid bıən.
Miladi 2017 minnə sorədə Astanə muzakirəon de İron və Rusiyə təşəbbus və Tırkiyə həmrohəti və de Suriyə daveon iyən şəroyeti həll və həminə kişvərədə 6 sor canq, avarə bey iyən xərobion bə oxo rosniye hədəf bino bıə. Miladi 2017 minnə sori Yanvarə manqədə, Ğəzaxıstonədə Astanə iclosi iminnə dıvrə ya Suriyə sulh iclos de İron, Rusiyə və Tırkiyə iştirok bərpo bıə.
Bə İrna raporti əsos, Astanə nomo 3 tərəfi həmkarion dəvomi iyən çəy nəticə qarantiyaəkəyon 7 minnə iclosədə, İron İslam Respublika, Tırkiyə iyən Rusiyə yolon mıştərəkə bəyoniyədə omə: İron, Rusiyə və Tırkiyə bə Suriyə Ərəbi Respublika ərazi vəhdət, istiğlol və hakımiyəti stabilə təəhhud, həmçınin bə İ Bıə Milləton prinsipon və hədəfon təkidış karde iyən təsdiğış do ki ım prinsipon bəpe həmmə kəson tərəfo təyid bıbu və hiç hərəkəti ım prinsipon zəif kardey əzı ni.
Həmçınin ım bəyoniyədə omə ki Suriyə muxtəlifə məntəğəonədə terroristiyə qrupon və çəvon vabəstə bıə qrupon fəaliyət və iştiroki əlovə bey məhkum kardedə, əcumlə bə ğeyre hərbi təsisaton həmlə kardey ki beqınohə kəson kıştə bois bıə. həmçınin ım bəyoniyə bə Suriyə Şimol məntəğə həmmə təəhudaton əncom bey təkid bıə.
Həminə cəhətədə Astanə nomo 3 tərəfi həmkarion dəvomi iyən çəy nəticə qarantiyaəkəyon kişvəron yolon, de terrorizm mubarizə bəhonə və meydoni tojə həğiğəton icod beyro, əcumlə mıstəğilə ğeyre ğanuniyə təşəbbusi botil zıneydə və de co tələbə prinsipon ki de Suriyə ərazi və çəy hakımiyəti zəifəti hədəf və ijən beynəlxalğə nıfuzon və həmləon royku, hamsuyə kişvəron milli əmniyyəti ələyh təhdid icodəkəy, ıştə irodə və cəhdon nışoşon dodən.
İron, Suriyə və Tırkiyə həmçınin de nati ğeyre ğanuni ovoştoniye iyən çəy bəromə soy bey ıştə muxalifəti nışoşon do. həmonə bəromə ki bə Suriyə məxsuse.
Im bəyoniyədə omə 3 qılə kişvəri yolon bə terroristiyə şəxson, qrupon və təşkilaton məhv beyro, həmkarion royku co kərə ıştən irodəon zumand kardey təkidışon kardən və bə bəşərdustanə beynəlxalğə huğuğon əsos, ğeyre hərbion iyən ğeyre hərbion strukturon oqətey tələbışon kardən.
İron, Rusiyə və Tırkiyə həmçınin təvafuğışon kardən ki məntəğədə vəziyəti stabilə normal kardey, Edleb və çəy ətrofədə, daveon kam kardey əcumlə insoni vəziyətiro vey cəhdon əncom bıbu.
Har 3 qılə kişvər Suriyədə və insoni şəroyeti barədə, ıştən nığılə niqəroni nışoşon dodən və həmmə itərəfiyə sanksiyaon ki de beynəlxalğə həxon, bəşərdustanə beynəlxalğə huğuğon iyən İ Bıə Milləton təşkilati prinsipon əkse, botil zıneydən, əcumlə beədolətə hərəkəton ki karde bəzne ım kişvəri co bey bois bəbe.
3 qılə kişvəri yolon həmçınin Suriyə daxıli avarəon və bepənohə kəson bəştə kə və sərzəmini oqarde iyən himoyə həxi təkidışon kardən.
Astanə nomo 3 tərəfi həmkarion dəvomi iyən çəy nəticə qarantiyaəkəyon kişvəron yolon, həmçınin bə Suriyə ələyh sionist rejimi hərbi həmləon dəvoməti əcumlə bə ğeyre hərbi strukturon məhkumış karde və təkidışon kardən ki ım həmləon beynəlxalğə huğuğon, bəşərdustanə beynəlxalğə huğuğon və Suriyə ərazi və hakımiyət və məntəğədə stabiləti və daveon əlovə kardey bois bəbe.
ım iclosədə əlovə bə Suriyə məsələ, Putin, Rəisi və Ərdoğan muxtəlifə baxşonədə və siyasi, iğtisodi mıştərəkə həmkarion əlovə bey xoto bə 3tərəfiyə həmohənqion zumand kardey təkidışon kardən.
