Nəhcul-Bəlağə hikməton

Nəhcul-Bəlağə hikməton

Və ğalə Əli(ə):”La yəkunus-sədig…dust əve ki,ıştə dini bıvə seqlə mevğıyədə pəyduko:renc iyən bəloədə və peştono iyən qıləy zəmon ki,dınyoku bışo”.

Əmirəl-Muminin İmom Əli(ə) Nəhcul-Bəlağə 134-ə hikmətədə çe qıləy həyğiyə dusti nışonəon bəyon kardedə və hamyedə:”La yəkunus-sədig…dust əve ki,ıştə dini bıvə seqlə mevğıyədə pəyduko:renc iyən bəloədə və peştono iyən qıləy zəmon ki,dınyoku bışo”.

Inson çun qıləy iştimoyi mevcude,əve noçore de cokəson qıləy irtibot iyən dustətiş bıbu.əmmo ısət de kom kəsu dustiyəti kardey bıbu,qıləy vey muhimmə məsələonkuye.çıro ki,çe dustiyəti dayirə nəyinki,fəğət de tobə umri oxo,bəlkəm çe maqi bədiqə həm dəvom pəyduko.Furğani mıborəkə surə 28-ə şərifə ayədə omı ki,cəhəndımədə bıə fərd ah bəkəşe,əfsus bəharde iyən bəvote ki,ey kaş az,de fulon kəsi dust bıənıəbim,(Ya ləytəna…)

Həmçinin Zuxrufi mıborəkə surə 67-ə şərifə ayədə bə qınokoron dustiyəti işorə kardedə ki, çokonə axırətədə çe qınokoron dustiyəti bə dışmenəti təbdil bəbe.qıləy holədə ki,çe imoni əhl iyən pərhizkoron dustiyəti ğıyoməti ruji həm baği bəmande iyən mandeqare.

Bə Əmirəl-Muminin İmom Əli(ə) hamye əsos bın hikmətədə çokə dust əkəse ki,de insoni yekdıl iyən i ranqədə bıbu və çı niyoz iyən ehtiyoci zəmonədə əy şonıdo.çəy qiriftor bıə zəmonədə bəçəy koməqi səmt dastpoçə bıbu,bıvito,bışo iyən çəy ğəm,şoyvonəti,rohəti və renci dılədə bıə zəmonədə deəy həmdard bıbu iyən şərik bıbu.həlbəttə,çokə dust de iddiyo iyən şuori məlum beydəni,bəlkəm çe jimoni etat-petatonədə çe şəxson vucudi əsl,bəvonədə oşko beydə.bəhisob çe ləyoğətinə dusti səçın kardeyədə əsl və əsos,əxloği iyən insoni meyoronin.

Bəzi duston dayima intizorışon heste ki,ıştə nışon doə xıdməton mığobilədə,hukmən bəvon qıləy xıdmət nışon doey bıbu.təbiye ki,harvaxti ın ko bə əməl nıvoy iyən çəvon koon əvəz beşey nıbu,əy bə kəno bənoe.bəçəy xotoye ki,votedəmon:həyğiyə dust əkəse ki,çəy dustiyəti bə məhəbbət,səfo iyən sədoğəti əsose,nəyinki,bə xıdməti nəticə əsos iyən bənə ticorəti formədə bıə ko.əvon zu və ğudrət pəydo kardə zəmonədə bəştə duston xıdmət kardedən iyən çəvonku qıləy cəvob çəş kardedənin.hejo bə həmonə dəlili xoto boçəvon duston muşkiloton bə əməl omeyədə həm,hiçvaxti əvoni tənho vo doydənin və dayima bə dustiyəti usul iyən prinsipon əməl kardedən.əvon qıləy holədə ki,çəvon duston hozzı nıbə zəmonədə həm,əvon icozə doydənin ki, ikəs çəvon peştono dumo əvon qıləy yavə sıxan bıvoto iyən çəvon ğıybəti bıko.hətto çımisə həm bəpe qıləy zəmon ki,çəvon duston çe dınyoku bışon iyən çəy dusti dast çı həmmə çiyonku kuto bıbu və həni bəy qıləy xıdmət kardey umuş nıbu,əy çe viro bekardedəni,bəçəy jimoni həmro iyən fərzəndon osə ğandedə ta çəvon muşkilon həll bıko iyən çəy yod və xotırə bəyji oqəto.