Nəhcul-Bəlağə pand iyən hikməton

Nəhcul-Bəlağə pand iyən hikməton

Şəvi nimə rəsəbe.astovəon çe səhər iyən sınbi zəmoni omey mıjdəvoni doydəbin.Əmirəl-Muminin İmom Əli(ə)orom iyən ohostə biyobonədə qəm peqəteydəbe.Əli(ə) de şəv,yali mandey iyən ğurbəti munis iyən unsış qətəbe.hiçkəs İmom Əli(ə) iyən çəy barzə əndişəon  zıney əndozədə nıbe,ə həzrət bənə qıləy şami coyli nur baxş kardedəbe ta hıtəkəson oğo bıbon iyən oğo bıə kəson həm aqah bıbon və aqahon həm bə hərəkət səmt boon.qıləy hərəkət ki,insoni bə loyığ bıə məğami rosnə həyoti bəy bıbaxşo.əmmo əfsus ki,əy dərk kardedə nıbin iyən ə həzrət noçor  be bışo bə biyobon və de tul və xoki uns qəteydəbe.quya və jıqo bızın tul iyən xok ə həzrəti bəsə çe zəmini əhlisə vey çok zıneydəbin və çə həzrəti məğam iyən mərtəbə ııştə ədəb-ərkoni nışon doydəbin.xok iyən tul çe Əbu Turobi sırri oqətə vırə və məkon be.

Həmonə şəvi Kumeyl ibn Ziyod ə həzrəti biyobonədə təğib kardedəbe.əvon poşon noəbe bə biyobon ta çe əğyor iyən cokəson və ğəribə odəmon çəşonku bə diyəro de iyande qəp jeydəbin iyən dardı-dıl kardedəbin.Həzrət İmom Əli(ə) ki,bəy Əbu Turob həm votedəbin,bə Kumeyli nəzə kardə holədə hamyeşe:beşək,çı odəmon dılon bənə qıləy zərfiye ki,çəvon həmməysə çokə qıləyni çəvon zərifə qıləyniye.ın dılon çe elmi zərf və ğabonin.bəziyon zərfon əmmo xali iyən təye.

Quya Əmirəl-Muminin İmom Əli(ə) çe Kumeyli dıli barzə zərfiyyətiku xəbədo be ki,həmonə şəvi nimədə əvış ıştə həmnışin iyən həmsehbətış kardəbe və ıştə sırron iyən nvıotə sıxanonış boəy hikoyət kardedəbe.Əmirəl-Muminin Həzrət İmom Əli(ə) ıştə sıxanonış jıqo dəvomış doe:Ha Kumeyl ha! mərdum seqlə dastən.Rəbboni alimon,rostə royədə qəm şodə elmi tələbəon iyən sıvıkmazqə şəxsiyyəton ki,hiç qıləy kamə ehtırom iyən erjışon ni.

Əvon bənə nunəlokə muçəkonin ki,dayima bə vo iyən tufon əvoni bın tərəf-bə tərəf bardedə və əvon çe har qıləy sədo dumo hərəkət kardedən və de har qıləy vo-vavazi bəro dəqıneydən və de qıləy kuloki hərəkət kardedən.nə de elmi məşəli qıləy ruşnə pəydo kardedən və nə əvon bə qıləy ğoymə təkyəco pənoh bardəşone.

Əvon bə hakəs iyən nomərdon tabe beydən ki,çəvon xılxədə qıləy fəryod bıbu.həx iyən həxtələbəti boəvon qıləy məfhumış ni.ıştə ağliku bəhrə nıbardə holədə ımruj bə ikəsi nəfi iyən maşki bə cokəson xəyri şuor doydən.nəhoyətədə həm çe jimoni məno nıfamə holədə və dərk nıkardə holədə və ya çe insoni de heyvoni həyoti miyono mıəyyən kardey ğudrətış nıbə holədə, çe dınyoku şeydə və yə bə fırsət tələbə neyçiyon tor eqıneydə.yeqanə çiy ki,boçəy ın yavə iyən anormalə vəzyəti bəhonə bey bəzıne,bəçəy coni çe har tərəfinə cəhl iyən nodonəti nufuze. nodonəti yeqanə çiye ki,insoni çe insoniyyətiku oqəteydə və əy bənə heyvonati və ya hətto çəysə həm saru ğərol doydə...