Nəhcul-Bəlağə pand iyən hikməton
Nəhcul-Bəlağə pand iyən hikməton
Torıxədə omə ki,Xəvarici fıtnə otəşi okıştey bəpeştə,Həzrət İmom Əli(ə) bəsə Kufə məçiti minbərisə rost be iyən İlahi həmdo-səno bəpeştə bə qıləy şəxsi cəvobədə ki,çə həzrətiku pand iyən moyizəş tələb kardəbe, jıqoş hamye:”Yəkrəhul-məovt likəsrəti zunubihi....(çə kəsonku məbi ki,)bəştə kardə veyə qınon xoto çe maqiku xoşış omeydəni,əmmo bə maqiku bə diyəro bey səbəb bıə veyə koon əncom doeyədə isror kardedə”.
Çəmə insonon veyni ıştə jimoni dırozi qıləy ziddiyyət təcrubə kardedəmon:maqiku tarsımon heste.çıro ki,ıştə əməli konomə iyən dəftəri dəvəşə holədə vindedənimon.əmmo çe tobə iyən ıştə nomınosibə rəftoron isloh kardey əvəzi,ijən həm həmonə qınon əmə tikror kardedəmon. Xıdovənde-Aləm Bəğərə mıborəkə surə 95-ə şərifə ayədə çe yəhudiyonku iqlə dastə barədə jıqo hamyedə:”Və lən yətəmənnəovhu...əvon bəştə bənav vığandə yavə əməlon xoto,hiçvaxti çe maqi oruzu nibəkardeyn”...
Həmçinin peşonə omə ayədə jıqo hamyedə:”Yəvəddu əhəduhum....çanədə ki,çəvonku har qıləyni oruzuşon heste həzo sor umr bəvon doey bıbu,qıləy holədə ki,çəy ın dırozə umr əy çe (İlahi)əzobiku niobəqəte”.
Əmirəl-Muminin Həzrət İmom Əli(ə) ıştə nəsyəton coqlə baxş iyən hissədə jıqo hamyedə:”İn səğimə zəllə nadima...(çə kəsonku məbi ki,)havaxti noxəş beydə(ıştə yavə əməlonku) peşmon beydə iyən əqər bədənış solim bıbu,əmniyyət hiss kardedə və de rohətə xəyoli və holi de sətasponey məşğul beydə.havaxti conış səlomət iyən solim bıbu,xudpəsəndəti kardedə və çoko ki,bə noxəşəti qiriftor beydə,məyus iyən noumu beydə.əqər qıləy bəlo bəy bırəso,noçorən de zəlilə formə dıvo bəkarde və çoko ki,bə qıləy osoyişi dast pəydo bıko,məğrurə formədə dim qordıneydə....
Məcidə-Ğıron çandə kərə bə ın məsələ işorə kardedə ki,insononku kali qıləyni bəvon bəlo rəsə zəmonədə bənə beçorə iyən bədbəxtə odəmon ıştə daston bo dıvo kardero rost kardedən və əqər bə qıləy oroməti və rifohinə jimoni bırəso,de məğrurəti Xıdovəndiku dim qordıneydə.joqo ki, Ənbəkuti mıborəkə surə 65-ə şərifə ayədə hamyedə:”fəiza rəkibu...əvon bə kəşti suvor bıə zəmonədə,Xıdo de ixlosi vanq jeydən,dıvo kardedən (və ğərəz əy çe viro bekardedən).əmmo qıləy zəmon,Xıdovənd əvoni bə hışki bırosno iyən peroxno,ijən həm mışrik beydən.çe ğəşənqe çe Həzrət İmom Əli(ə) sıxanon de İlahi sıxanon eyni formədəy iyən həmohənqe. hədərə ni ki,Kərimə-Ğıroni mıfəssıron bın bobədən ki, Məcidə-Ğıron iyən Əmirəl-Muminin İmom Əli(ə) har dıqləyni iqlə həyğətin ki,dıqlə ləfzi və şifohi iyən feli və ğeyri-verbal surətədə omən və bə iyande dəçıkən iyən co bıənin nin....
