Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəloğə 154-ə hikmətədə bə ın muhimmə nuktə işorə kardedə və hamyedə:”Ərrazi bifi`li...Əkəs ki,bə qıləy cəmyəti ko rozi bıbo,bənə ə kəsiye ki,bə koyədə iştirokış kardə(əmmo) ə kəs ki, botılə koy əncom doeyədə mıdoxiləş heste,çəy dıqlə qınoş heste:botıli əncom doey qıno iyən bəy rozi bey qıno”.
İmomi(ə) ın fərmayiş və əmr mumkine bo bəziyon ın sıvoli icod bıko ki,boçi ikəs ki,zılmış kardəni iyən bə zolımon iyən qınokoron koməqi koyədə hiç qıləy rolış bıəni və fəğət çəy dıli roziyəti bə curm iyən qınoədə iştiroki boyis beydə?.
Çımi cəvob ruşine və əv,həm çimiku iborəte ki,inson çe cokəson kardə koonku rozi bey zəmonədə,ım “xəş omey” de qıləy co iborəti “ğəlbi roziyəti” əməl iyən rəftorədə həm zohir beydə.çımonsə əlovə,jıqo kəson İslomə dinədə vey muhim iyən dıjd bə hisob omə vocibotonku qıləyni bıə çe əmr bə məruf iyən nəhy əz munkəri məsələonədə,boştə vəzifəon əncom doeyro ğadir nibəbeyn.
In məsələ Kərimə-Ğıroni ayəonədə iyən İslomi rəvoyətonədə mıxtəlifə forməonədə bəyon bıə.Nağəye-Səmud və Səmudi ğovmi şaturi kıştey dastonədə Kərimə-Ğıron hamyedə:”Həmonə ğovm həmmə bə İlahi əzobi təsiri xoto çe miyoniku şiin”,qıləy holədə ki,i nəfəri Nağəye-Səmudış bə ğətl rosnəşbe.əmmo çunki,cokəson həm bəçəy kardə ko rozi bıəbin,əve Xıdovəndi bəvon həmmə əzobış doe.
Salehi(ə) noğə və şatur qıləy moə şatur be ki,de İlahi mecuzə iyən çe Həzrət Salehi(ə) pəyğombərəti təyid iyən təsdığədə ofəyə be.çın şaturi əhəmiyyət bəçəy xılğəti məxsusə formə xoto be ki,de İlahi mecuzə xəlğ kardey be iyən bo Səmudi ğovmi imtovoni vəsilə iyən vositə be.
Bın zəminədə çe Həzrət İmom Rızaku(ə) qıləy rəvoyət nəğl kardey bıə.iqlə şəxsi çə həzrətiku dəparseşe:çokonə çe bəşəriyyəti nicotədə və xiloskor bıə Həzrət İmom Məhdi(ə) ğıyom kardə zəmonədə,çe Həzrət İmom Huseyni(ə) ğatilon fərzəndon bəçəvon dədə-bobon kardə əməlon xoto əvoni bə ğətl bərosne?.qıləy holədə ki,Xıdovəndi Fatıri mıborəkə surə 18-ə şərifə ayədə hamyəşe:”Və la təziru...və hiç qıləy qınokor çe cokəsi qıno bo bəştə duş nibəkəşe?.İmom Rıza(ə) hamyəşe:bəçəy xoto ki,ın fərzəndon bəştə əbo-əjdodon kardə əməlon rozi bin,deəy iftixor kardedəbin və hakəs bə qıləy çi rozi bıbon,bənə ımiye ki,əvış əncom doə.peşo İmom Rıza(ə) hamyəşe:”Və ləov ənnə...Əqər məşrığədə ikəs bə ğətl bırəso və məğrıbədə cokəs bə həmonə ğətli rozi bıbo,rozi bıə şəxs Xıdovəndi nəzədədə həmonə ğətlədə şərike”....
