Tolışə məholədə bərğ və ğazi problemon

Muasirə zəmonədə əhali firəvanə jimoni təmin karde ro məntəğon de ğaz və bərği təchiz karde yolə əhəmiyyət hestışe. Hələ Şura hokuməti məmləkəti həmə məntəğon befasilə de bərği təchizat təmin kardəşbe. İlham Əliyeviən çand kərə votəşe ki, Respublika məntəğon 95% de ğazi təmin kardəşone. Əmo real vəziyyət bı məsəlonədə hələ xeyli problemon mevcud bıe nişon dodə.

“Nur-az.com” sayt Liki şəhrestani Siyov diy camaati ocizanə vəziyyətiku bəhs karedə qıley məğalə bə əhandon edaştəşe. Diy sakin Sulduz Əbilovi çe hokumətiku ıştə notoziəti ifadə kardəşe, votəşe ki, diy odəmon 80% bekorəti səbəbiku bə Boku kuç kardəşone, çəmə hətto ali təhsilinə çıvonon sığə karxononədə fəhləti kardedən, hambolə vıjoronədə bo koy nəvedən ki, boştə xeyzoni ğıçi nunə pul ğəzənç bıkon. Tosə ısət bə di ğaz okırniəşon ni. Əhali de kutləvi imza dee bə Prezidenti muraciət kardışone, əmo ımi nəticə doə nışe. Bı səbəbən, kəon de ezımi tosbonie məcbur bedəmon. Imən bə tolışə vişon məhvi səbəb bedə.

“Tolishmedia.com” saytən Tolışə məholi dionədə qonə sosialə vəziyyəti barədə silsilə məğalon bə cəmiyyəti nəzə rosnidə. Bə ım məlumaton əsasən, bə Tolışıstoni məntəğon 65% -i ğaz okırniəşonni. Liki şəhrestoni Şınqəduon-Xanəqah roy ətrofi dionədə ğaz ni, bərğən de fasilon doə bedə.

Hostoro rayoni Şahağaci diy sakin Xanbalə Pələnqovi votəşe ki, diədə ğaz ni, i həftəsən veye ki, bərğşonən bıriə. Jəğonə rujonən bərği har ruj 2-3 saat dodəbin. Zımısoni bı jıqo sardə vaxtədə diy camaat çe cardiku əziyyət kəşedə, noxəşinon miğdar xeyli ziyod bıə.

Lankoni Tuədo, Masəlu Dəmbəlov dion əhaliən bərğ və ğazi nıbeku bə rayoni əlağədar təşkilaton, bə devləti rəhbəriyyəti çanədə şikayət, muraciət və xahişon bıkonən, çımon hiç qıley nəticəşon bıə ni. Tolışə məholi əsasən bandə dionədə sosial vəziyyət sorbəsor həniən qıvonin bedə.