“Tolışon sədo” rujnomə tojə numrə çapo beşə
Fevralə manqi orəxnə rujonədə "Tolışon Sədo" rujnomə ımsornə dıminə numrə dərc bıə. Rujnomə xulasə bəşmə nəzə rosniedəmon.
Rujnomə sıftənə səhifədə ıştə tojə muəllifon - Şərəfəddin İlkin və Nicat Hokuməliyevi de əhandon oşno kardedə, çəvon tolışi zıvonədə nıvıştə çand qılə şeeri bə əhandon edaştedə.
Dıminə səhifədə çe Azəri-Tolış ibemoni sədr Mehdibəq Səfərovi "Bastəri musibət" nominə hekoyə dərc bıə ki, əyo çı tolışə xeyzoni mısibətiku, umumən isə çı tolışon dardı-səriku, məişəti işkilonku votə bedə. Jıqo peqəteədə Səfərov "Bastəri musibət"ədə çı tolışon bənə xəlği ıştə mentaliteti qin karde çanədə qonə faciə bıe bə əhandon nəzə rosniedə.
Rujnomə seminə səhifədə sərredaktor Rafiğ Cəlilov ıştə "Kie vəhşi" məğalədə çe Tolışıstoni sərşəhər Lankoni ğəbıstonədə Tolışi Milli Ruf Əli Nasiri vəfoti dıminə sorəqardışi ğeyd kardə tədbiri barədə ıştə fikri bə handəkəson nəzə rosniedə. Sıvoy bımi həminə nıvıştəyədə əv tolışə pərçəmi həxədən nıvıştəşe ki, “ım pərçəm dınyoədə yekanə atribute ki, həmmə tolışon bəştə sə qırd karde zınedə, har qıley tolış ey ıştə ğəlbədə ehaştedə. Peşo Cəlilov pantırkon bə Mehdibəq Səfərovi kardə hucumonku, iyən çe Boku “Sədərək” ticariə mərkəzədə bə "Aləm" jurnali təsisəkə Vuqar Həmati sə omə işkilonku nıvıştedə.
Rujnomə şəşminə səhifə bə etnoqraf Nəriman Tolışi "Liki Zuən əhali mənəviə mədəniyyət" nominə elmiə tədğiğati 3-minə fəsli iminə poə həsr bıə ki, həminə nıvıştəyədə Nəriman muəllim çı Zuəni əhali folklori həxədə bə əhandon məlumat dodə.
Rujnomə peşonə səhifədə şair-filoloq Allahverdi Bayrami "Sıləhuədə bemə vıl" romani iminə vəslə doə biə. Həmonə ğismədə muəllif romani handəkəson de çey obrazon oşno kardedə.
Orəxnə səhifədə çı Atabala Babayevi "Çəmə vəhişt" nominə nıvıştəy doə bıə. Əyo əv çe kali beməxə - manqurtə tolışon bəştə moə zıvoni biqonətiku sıxan kardedə.
Həmçinin rujnomədə çe Xilqəti, İsmayıl Kulətonvoji, Mərasim Hacızadə, Mirfayaz Likməkani, Rafiq Muradi, Xanəli Tolışi, Tofiq Nicoti, Azər Bandıji və Camal Lələzoə tojə şeer və hekayon dərc bən.
Rujnomə həm ım, həmən dəvardə numron “Rafiqibloq” saytədə hande bəzıneyon.
