Çe Hacı İlham Əliyevi huğuğon mudafiə komitə bəyonat doşe.
Çe Az.R sandinə ruhaniə alimon, çand qılə partiya və təşkilatə rəhbəron Hacı İlham Əliyevi bə cinayətə məsuliyyət cəlb karde məsələ muzakirə kardəşone.
Im muzakirəonədə AİP İdarə heyəti uzv Akif Heydərli, Dini Azadion Mudafiə Mərkəzi sədr İlqar İbrahimoğlu, "Maide.az" sayti sərredaktor Şeyx Sardar Hacıhəsənli, Azərbaycani Ruşinəfamon İbemoni sədr Eldəniz Ğuliyev, bo Ğərəboyi ro İslami Muğavimətə Hərəkati səvon Revşən Əhmədli və həniən co şəxson votemon kardəşone, Hacı İlhami dastir karde tam beəsos, bey bə nav doə ittiham bənə şər və bıhtoni zınəşone.
Akif Heydərli votəşe ki, Hacı İlhami kədə polison axtarış bardəşone, bə çey cinayəti dair hiç qley subut və dəlil peydo karde zınəşonni.
Hacı İlqar İbrahimoğlu ğeyd kardəşe ki, əmə orəxnə 2 sorədə hokuməti bə dindaron munasibətədə kamişi osanqe hiss kardedəbimon, əmo ısət məlum bedə ki, çəmə qımon bə du beşe. Əmə təəccub kardedəmon ki, Hacı Sərdari çe zindono beşeku hiç 10 ruj dənıvarde, bo Hacı İlhami cinayətə koşon bino karde. Jıqo aqressiya nə bə devləti, nəən bə hakimiyyəti hiç qıley foydə nişe. Hokumət i tərəfədə islahat elan kardedə, de siyasiə partiyon dialoq dəvunidə, diqər tərəfədə İslamə partiya rəhbəri bə zindon dənodə. Im ciddi qıley paradokse.
Muzakirədə iştirak kardəkəson bə ğəror omin ki, çe Hacı İlham Əliyevi huğuğon mudafiə komitə təsis bıkardon. AİP navğədəmono qıley – Akif Heydərli Komitə sədr vıjnieşone.
"Maide.az" xəbə dodə ki, komitə ıştə iminə iclasədə AİP sədri əvəz Hacı İlham Əliyevi dastqir, bə çey əleyh cinayətə ko bino karde məhkum, hokumətiku ənətəxir ey bə azadi vadoe tələb kardəşe.
