Az.R-ədə bərği problemon
Bə Prezident İlham Əliyevi doə “ Enerji sektorədə maliyyə intizami zumand kardə proqrami” dəstiron muvafiğ “Azərişıq” Ojə Səhmdarə Cəmiyyəti tərəfo herı-hevujə texinki və təşkilati tədbiron bino bıən.
Məğsəd bərğo istifadə kardə təşkilat və muəssison, həmən fərdi abonenton məsrəf kardə eneri pulon bə tam avjor karde nail bıeye. Im Səhmdarə cəmiyyətiku bə "Sputnik Azərbaycan"i məlumat doəşone ki, çəvon bardə mubarizə nəticədə xeyli muvəffəğiyyəton bə dast vardəşone, əmo elektriki talan kardə fakton hələən hestin. Kali istehlakçion, məxsusən villa xıvandon, sənaye, ictimai iaşə obyekton, hotel və mehmonxonə, oranjeriya soybon bərği puli avjor kardedənin, və ya ğeyri-ğanuni, be elektrikə hisobkarə cihazi bə xətt anqıl qınidən, ımən diqər istehlakəkon , məxsusən əhali de bərği təchizatədə problemon bə miyon vardedə. "Azərişıq"i rəhbəriyyəti bə jəqo sahibkaron çəşnavi doəşe ki, bə ğeyri-ğanuniə əməlon orəx bıdon, əks təğdirədə bə çəvon obyekton elektrikə təchizati ğət bəkarden.
Im məlumatiku 1 həftə bədiqə, fevrali 27-ədə Boku Nizami və Xətai rayoni əraziədə elektrik ğət bıe, şəhəri 20 qılə çoroədə svetoforon okuşin, metropoliteni "Həzi Aslanov", "Əhmədli", "Xalqon dustiəti", "Neftçilər" və "Koroğlu" stansiyaonədə hərəkət dəmande.
2 ruji bədiqə Boku – Sumğayit elektrikə poyizi hərəkətədə mışğıl bə əməl ome. Çimi səbəb de elektrikə xətti kabeli dızdie izah kardışone. Marti 4-minə ruji "Maide.az"i xəbə doşe ki, Boku Beynəlxalğə Avtovağzalədə bərğ ğət bıə. "Azərişıq"i mətbuatə xidməti səvon Mustafayevi votəşe ki, kande-ko kardə vaxti bərği kabeli zədə se nəticədə ım ğəzo qıniə, ğıssə muddətədə çey nəticə çe arə bardəşone. Çe respublika əyalətə məntəğəonədə bərği muntəzəm, hətto har ruj bə çand bəjəm ğət bıe anədə bə adi qıley hol peqardə ki, əhali həni bey pape bedəni, Mass-median bımi reaksiya dodəni. Isət ım anormal vəziyyət məğəvuji paytaxtiən etənedə. Jıqo bışo, həni Bokuədən bərği ğət bıe anədə muntəzəm bəbe ki, cəmiyyət bey pebəmujie, hiç kəs bey pape əbıni, KİV-onən çey barədə jı-çi əvotnin.
