Lankonədə bə karantinə rejimi munasibət.

Boku hokuməti rəsmən etiraf kardəşe ki, Lankon çe Respublika bə koronavirusi vey məruz mandə məntəğəono qıleye. Hejo bı səbəb dəvardə həftə orəxnə rujonədə sərt karantin elan bıə 5 qılə əraziono qıleyən Lankoni şəhər bıe.

Operativə Ğərərqohi  iyuni 14-15 -minə rujonədə çe məmləkəti 9 qılə zonadə elan kardə şiddətinə karantinə tədbiron bə lankoniən aide.  Azadi Radio muxbir Lankoni əhali bə ım tədbiri munasibət omutəşe. Çe şəhəri əji İltifat Rəhimzadə fikir jıqoe ki, Lankonədə sərt karantinə rejimi tətbiği zərurət  bə əhali izah karde lozime. Rayonədə bə korona mubtəlo bıe dinamika barədə hiç qıley məlumat dodənin. Əhali maddi quzəron vey qone. Jıqo sərt tədbiron tətbiğ bıe, çəvon problemon həninən qıvonin kardedə.  Həftə orəxnə 2 rujədə bə əhali kəyku bə kəno beşe icazə nıdoeku jıqo məna hasil bedə ki, virus həftə orəxədə şuək kardedə, əmandə 5 rujədə həmul bedə? Rəhimzadə ımən ğeyd kardəşe ki, Respublika televiziyaon mutəmadi məlumat dodən ki, çanədə şəhrıvand testo dəvardə. Əmo Lankonədə əhali çe testo dəvrde barədə hiç kəsi xəbə nişe. Camaat vıjoronədə, çayxonəonədə, asudə, bemaska nəvedən. Şanbə - işanbə rujonədə kəyku bə kuçə beşe ğədəğən bıe səbəbi bə sə dəşedənin.

Muəllim Rahim Nuriyevən bə ım tədbiri neqativ diə kardedə. Votedə ki, dionədə korona noxəşinon veyin, əmo bə di şe-omə kardə ictimai nəğliyyatonədə bə karantini şərton əməl kardəkəs ni. Rayonədə internetən bərbad vəziyyətədəy.

Lankoni Mərkəzi Mərizxonəku de testi əlağədar bəyon kardəşone ki, bimi ro  muraciət kardə şəhrıvandon muayinəku dəvunidən, numunə peqətedən, bə Tauni Əleyh Stansiya vığandedən. Testi əvon tədğiğ kardedən.

Lankoni Telekommunikasiya Şəbəkəkuən bə muxbiri məlumat doəşone ki, rayonədə internet hiçən zəif ni. Be bəzıne ki, kali abonenton internet xəttonədə problem bıbo. Jəqo nırəsəyon Şəbəkə həmkaron ğıssə muddətədə çe arə bardedən.