Zindonədə bo Aslan Qurbanovi jimoni xəto bə əməl omə

Tolışə bloqer Aslan Qurbanov, ki Boku Oonə Cinayəton Məhkəmə əv bə 7 sorinə zindonə cəzo məhkum kardəşe, çey zindonədə səhhət xeyli xərob bıə

Bı barədə Qurbanovi ailə uzvon bə Meydan TV məlumat doəşone. Əvon qəp jəşone ki, Aslan çe epilepsiya noxəşiku əziyyət kəşedə. Məhbəsədə bə işqəncəon məruz mandə. Məhkəmə hokum hələ bə ğıvvə nırəsə, əvşon tadibəsə bə umumiə zindonxonə dəğandə, çəyoən bə karser dənoşone. Əyo ey ıştə huş qin kardəşe, çok bıə ki, vaxtədə əvşon çəyo bekarde zınə. Aslan Qurbanovi əvlodon ımən ğeyd kardəşone ki, tars heste ki, ey de separatçiə vonə bənə Novruzəli Məmmədovi, bənə Fəxrəddin Abbasovi zindonədə ğətl bıkon. Bə Aslani vaxtədə çey dəvocati rosnie mumkun bedəni, ımən çey jimoni bə xəto  dəğandedə.

Çe Penitisiarə Xidməti de ictimaiyyəti əlağə şebə səvon Mehman Sadığovi isə votəşe ki, əvon məhbuson həmə huğuğon təmin kardedən. Məhkum bəkəson səhhət və saleməti Tibbi İdarə nəzarəti jitonoy. Həm əvon, həmən Penitisiarə Xidmət məhbuson saleməti ro kafi ğədər ko kardedən, bə məhbuson lozim bıə dəvocaton rosnieədə mışğılon mevcud bıe həxədə votəyon bə həğiğəti muvafiğ ni.

Bə yod bıəmon ki, Aslan Qurbanovşon ponə sori iyulə manqədə de milli nifrət və deşmenəti təbliğati barde ittihami dastqir kardə. Fileyğə ey ıştə “Fasebook” və “İnstagram” səhifəonədə jıqo nıvıştəyon dərc kardəşebən. Azərbaycani Tolışon İctimai Şura de ım ittihami əlağədar ıştə  bəyonatədə elan kardəşe ki, Aslan Qurbanov  sosialə şəbəkəonədə tolışə muğənnion handə mahneon, tolışə şairon nıvıştə şeron, tolışəmənşəninə ğəhrəmanon barədə məlumaton baxş əkardi, çəvon təbliğati əbardi. Bə çey ım hərəkəti bənə milliə nifağ və deşmenəti ranq je sərostə ko ni.

Aslani vəkil Fariz Namazlı ğeyd kardəşe ki, əvon məhkəmə hokmiku apelyasiya şikayət doəşone. İyunə manqi 9-minə ruji Boku Apelyasiya Məhkəmədəbə bə ım şikayəti diə bəkarden.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.