Lankoni məhkəmə bə ekoloqiya vəzarəti şikayəti diə kardedəni.

Lankon rayoni əraziədə qıley “PROFCO” nomədə Məhdid Məsuliyyətinə Cəmiyyət heste.

Ey Vazəruədə xırış bekardə karxana onoəşe. Əyo de xırış bekarde və həvate məşğule. Bo ımi ro bey Lankoni şəhəri icra sərdari deştə 2014 –minə sori 13 may tarixinə ğərori 7 hektar ruy məcra əraziədə xırış bekarde icazə doəşe. Bı icazə muvafiğ devlətə Ekspertiza İdarə bə muəssisə 5 sor muddətinə muvafiğə akt və inkişafə plani  sənədon doəşe. Isət həmonə sənədon vaxt orəxə. Devlətə Ekspertiza İdarə bı barədə bə muəssisə rəhbəriyyəti 2 kərə rəsmi ğaydədə məktub vığandəşe, çəvon ğeyri-ğanuni fəaliyyəti həxədə bey çəşnavi doəşe. Əmo muəssisə 2 sorisən ziyode ki, ıştə beğanuniə əməli dəvom kardedə.

De ım fakri əlağədar Ekoloqiya və Təbii Sərvəton Vəzarəti “PROFCO” şirkəti bə təbiəti jə ziyani aid təhğiğat bardəşe, həmonə sənədon bə Lankoni rayoni məhkəmə vığandəşe. “Teref.az” sayt nıvıştedə ki, məhkəmə hakim Mutəllim İsayevi bə ım koy xitam doəşe. Əmo ım ğərori suət bə şikayət kardə tərəfi tosə ısət vığandəşni. Bı barədə bə sayti muxbiri doə parsiən cəvob doəşni. Demiən məlum bedə ki, hətto Ekoloqiya Vəzarətən təbiəti ğeyri-ğanuni istismar kardə muəssisə vəy se zuş vışkidəni.

Həmonə sayt bə Lankoni problemon dair qıley məşaləşən həsr kardə. Bə cəmiyyəti məlum kardəşe ki, çe “Azərişıq” Ojə Səhmdarə Cəmiyyəti Lankoni Elektrikə Şəbəkə səhlənkarəti nəticədə şəhəri məktəbon əraziədə transformator məntəğəon bərbod vəziyyətədən. Bə əmniyyətə ğaydon muvafiğ həmonə budkaon kəybəon bəpe de kilidi bastə vəziyyətədə bıbo.  Əhandon bə sayt şəhəri 7 numrəninə məktəbi soədə ğəror qətə transformatorə budkə şəkilşonən vığandə. Oşko vində bedə ki, həmonə bərbodə vəziyyət bo məktəbi şaqirdon çanədə xəto bə əməl vardedə. Təğribən manqi bə diqə tojə təhsilə sor bino bəbe. Çok əbi ki,  “Azərişığ”i rəhbəriyyət jıqo beaburinə vəziyyətiku hali bıbo, tosə sentyabrə manqi təhsili bino bıe, Lankon şəhərədə transformatorə binaon bə səhmon dəğando ki, əvon bo əhali jimoni xəto bə əməl nıvardo.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.