270 nəfər çı Qiloni xidməti xeyməon mudiron Ərbəin mrosimədə iştirok bəkan.

Qiloni Ərbəin ğərorqo sərkatib xəbəş do ki ımsor Ərbəin Huseyni mərosimədə 270 nəfər xidmət xeyməon mudiron bə zairon xidmət kardeyro bə İrağ səfər bəkan.

Bə Tolışi Rədio raporti əsos Məcid Dohendo votışe: de diğğət bə İraği kişvəri məhdudiyəton ım kişvər bo Qiloni Ostan 320 nəfər xidmət xeyməonədə koəkəyon səhmiyə ixtisosış doə ki tosə bə ısət 270 nəfər çəvonku vığandə bıən.

Dohendo bə İraği kişvəri tərəfo bo zairon ğəbul kardə şərton işorə və əlovəş kardə: İrağ hiç zairi zəmini marziku ğəbul nibəkarde və fəğət pəre royku Ərbəini zairon ğəbul kardə iyən İraği co şərton həm ıme ki zairon bəbe koronavirusi vaksini 2 qılə doza bıjənon və pəreku 72 saət bənav çəvon korona test mənfi bıbu.

Dohendo əlovəş kardə: ım ğərorğo co xidmət xeyməon həm Qilon Ostani şəhronədə Ərbəine Huseyni matəmə əyyamədə xidmət bəkan, ım xidməton əcumlə bepul nun baxş karde, humanitarə xidməton və xorək baxş kardey şomil bıdə.

Əv umidvarətiş karde ki vəomey sorədə şərayet çok bıbu və həmmə Ərbəine Huseyni mərosimiku diyəro mandə kəsonro şərayet hozzı bıbu ki ım yolə məzhəbi mərosimədə iştirok kon

Dohendo ıştə sıxənon co baxşonədə çı Qiloni millət ihsononku təşəkkurış kardə və votışe: ımsornə sori əvvəliku tosə bə ısət 1 milyard və 450 milyon tımən milləti ihsonon bə Ərbəini ğərorqo doə bəy.

Əv pruqnuzış kardə kə bə kə nomo planədə 10 ton ihsoni bırz çı xəyyeron tərəfo cəm bıbu.

Qilonədə 24 xidmət xeyməon fəalin.