Qiloni vujuronədə nubəyniyə norınqi.

Qiloni boğonku muxtəlifə norınqi çıniye bino bıə.

Bə Qiloni Tele Rədio raporti əsos, Qiloni ditəsərrufat cihod idorə boğəvonəti koon mudir tojədən votışe: Qiloni sitrusə mivə boğonku muxtəlifə norınqi çıniye bino bıə və proqnoz bıdə ki ımsor Qiloni boğəvonon 7 həzo 850 ton muxtəlifə norınqi ıştə boğonku bıçinon.

Mənuçehr Parsafər bə ım məsələ işorəş karde ki Qilon 447 həzo hiktor norınqi boğonış heste, əlovəş karde: proqnoz bıdə ki ımsor Qiloni boğəvonon ım miğdor norənqi həvateyku 630 milyard riol bəromə kəsb kon.

Əv işorəş karde ki Rudsər Qilon Ostanədə sitrusə mivəon istehsolədə i minnə vırədəy, votışe: ım məhsul Lənqrud və Əmləş şəhrıstononədə həm istehsol bıdə.

Qiloniədə istehsol bıə norınqionku veyni de nubəyniyə surəti istifodə bıdə iyən çəyku miğdor bə hamsuyə Ostanon əcumlə Ğəzvin, Ardəvil, Əlburz və Tehron ixrac bəbe.

Qilon 11 həzo 163 hiktor sitrusə mivə boğonış heste, və Qilonıjon norınqi çineyku bəpeşt, narınc və çəyku bəpeşt həm portəxol çinyedən.

Im Ostanədə sitrusə mivəon çinye desbə vəomə bəhorə fəsli dəvom kardeydə.

Qiloni sitrusə mivə məhsulonku 90 faiz muxtəlif portəxolon əcumlə məhəli, xuni və tamson, təğribən 5 faiz norınqi və 5 faiz həm co sitrusə mivəon şomil bıdə.