İron iyən Azərbaycan Respublika miyono tranzitə ro pardi soxtey əməliyot.

Xosə tolışon, İronədə tojə dıvləti bino beyku tosə bə ısət İron iyən Azərbaycan Respublika miyono tranzit 62 faiz iyən ticorəti miğdor 30 fazi ziyod bıə.

Əmmo İron iyən Azərbaycan Respublika miyono bıə muhimmə mıştərik həmkarionku qıləyni şimol-cənub nomo karidori barədəy ki çəy i baxş Qilon ostani Ostoroku dəvardeydə.

Tojədən xəbə omə ki İroni roy və şəhr dute vəzir ki bə Azərbaycan Respublika səfərış kardə be zinə de ın kişvəri i minnə vəziri muavini bə i co bə Qilon ostani Ostoro şəhri varid be.

Bə İRİB raporti, həminə səfəri illət, şimol-cənub karidori komil kardey çərçivədə bıə Ostoro çay nomo ru səpe tranzit pardi soxtey əməliyoti bino kardey ğeyd bıə.

Ostoroədə İroni roy və şəhr dute vəzir həminə pardi barədə votışe: ın pard de İron iyən Azərbaycan Respublika miyono bıə həmkarion vositə iyən 18 manqi mıddətədə soxtey bəbe.

Rustəm Ğasımi əlovəş karde: Tehron-Boko miyono iğtisodi həmkarion inkişofi kənoədə, ın pardi əməliyoti bə vırə rosniye hukmən tranzit iyən xarıci ticorəti inkişofi həm bois bəbe.

Ostoro bənə İron və Azərbaycan Respublika miyono bıə 4 minnə sərhəddi, zəmin, dıyo və reyls xəttonku de Azərbaycan Respublika tranzit rabitəş heste.