Şiə və sınnion miyono vəhdət, çı Ostoro bə inkişof rəsey zəminəy.

Xosə həmzıvonon, Ostoro fərmondori sərpərəst votışe: şiə və sınnion miyono vəhdət, ım şəhrıstoni bə inkişof rəsey zəminə icodəkəy, və həminə cəhətədə alimon bənə dini təbliğəkəyon, muhimmə məsuliyətışon heste.

Bə İrna aqentiyəti raporti əsos, zinə və Ostoro fərmondari idorədə və de sınni alimon iştiroki dəvoniyə iclosədə, Enayəte Rızaiipur əlovəş karde: İroni kişvərədə bıə muxtəlifə məzhəbon və ğovmon miyono dustanə jimon, çı kişvəri fırsət və zərfiyətonku qıləyni bə hisob omeydə, və Ostoro şəhrıstonədə, şiə və sınnion miyono mislış nıbıə vəhdət və həmkari çəy nımonəy.

Əv ijən bəyonış kardə: 8 sornə muğəddəsə mudafiə zəmonədə, şiə və sınnion de yande bə ico kişvəriku mudafiə kardeşone iyən sınnion bə İron İslam Respublika nizomi 12 həzo şəhidi təğdimışon kardə.

Rızaiipur votışe: har ruj Ostoroədə bə şiə və sınnion miyono vəhdət əlovə bəbe və xususi cıvonon miyonədə inğilobi ruhiyə və İslami deşmonon vədə vəhdət icod kardey vey lozime, iyən dini alimon de İroni İslami Yolə Rəhbər, Həzrəte Ayətullah Xamenei əmri bəyon kardey vositə, bəpe vəhdətəbaxş bıbun.

Ostoro fərmondari sərpərəst əlovəş karde: ictimaiyəti əmniyyət və  ictimai, mədəniyət və iğtisodi bə inkişof rəsey, çı milləti vəhdəti xotoe, ki Ostoro milli və məzhəbi rəsm iyən adətonədə, sınni alimon zərfiyətonku istifodə kardeyku icod bıdə.

Əv idoməş do: dəvardə soron və tule tarixədə, de nizom və inğilobi deşmonon təfrəğə icod kardey xəbisə planon vucudi əmmo şiə və sınnion miyono vəhdət oqətə bıə iyən İroni islamiyə inğilobi səbarzəti bəpeşt həm dınyo istikbori xəbisə planon, de İmom Xomeyni(r) rəhbəriyəti vositə be təsir be iyən şiə və sınni miyono vəhdət ijən dəvom peydoş karde.

Ostoro fərmondari sərpərəst bə şiə və sınnion miyono vəhdəti oqətey təkidış karde və votışe: İslami umməti miyono vəhdəti oqətey vey lozime və məntəğə vəziyətiku ozod bey iyən bə oroməti rəseyro, vəhdət və ğovmon miyono bıə ixtilofon bə kəno noey qıləy muhimm məsələy.