Qiloni Masal şəhrıstoni ehtiyocinə şəxson miyono 1500 qılə məişət pəketon pəxş be.

Əzizə duston səlom, şımə nımoj-rujəon ğəbul bıbun, dıvo kardəm Xıdo rəhmət, məğfirət və inoyət bə şımə ğesmət bıbu, əzizon ımruj Rəməzanə manqi 10 minnə ruj Həzrəte Xədicə(s) rehlətə ruji sorəqardışe ki ım matəmə ruji bə şımə təsliyət ərz kardəm.

Isət şıməni dəvət kardəm bə ımrujnə xəbə reportaj baxşi quş bıdənən.

Masal Şəhrıstoni sepah fərmondə votışe: bə tojə sori bino bey iyən mıburəkə Rəməzanə manqi mınosibəti xoto, 1500 qılə məişət pəket, çın şəhri ehtiyocinə şəxson miyono təğsim bıə.

Bə Qiloni Tele-Rədio aqentiyəti raporti əsos, Palkovnik Kamyar votışe: ım koməkon bə tojə sori iyən mıburəkə Rəməzanə manqi mınosibəti xoto, de Masal şəhri sepah və bəsici səyo cəhdi vositə, korona virusiku zərəl-ziyon vində kəson iyən ehtiyocinə şəxson miyono pəxş bıə.

Əv ijən əlovəş karde: ım pəketon erj 500 həzo tımən bəbe.

Masal şəhrıstoni sepah fərmondə, Mehdipur həmçınin votışe: cəmədə ım məişəti pəketon erj, 750 milyon tıməne ki Masal şəhrıstoni ehtiyocinə şəxson miyono pəşx bıə.