Bəpe İmom Xomeyni(r)-i şəxsiyəti bə cıvonon yod bıdənən.

Ostoro şəhrıstoni cımə İmom votışe: rəsmi şəxson iyən mədəniyəti təşkilatonədə ko kardə kəson bəpe de virtual kanali vositə, İmom Xomeyni(r)-i şəxsiyəti bə çəmə cıvonon yod bıdən.

Xosə əməson səlom, Həzrəte İmom Xomeyni(r)-i rehləti sorəqardışi ruji bə şımə xıdmət təsliyət ərz kardəm. Umidemone ki əmə muvəffəğ bıbəmon, ım yolə şəxsiyəti roy, məktəb iyən hədəfi idomə bıdəmon. əzizon həmçınin Maştə Xordadə manqi 15 minnə ruji xuninə ğiyomi sorəqardışe ki ım mınosibəti həm bə şımə təsliyət ərz kardəm.

Dəvət kardəm de Tolışi Rədio bə ico bımandən və bə ımrujnə xəbə reportaj baxşi quş bıdənən.

Ostoro şəhrıstoni cımə İmom votışe: rəsmi şəxson iyən mədəniyəti təşkilatonədə ko kardə kəson bəpe de virtual kanali vositə, İmom Xomeyni(r)-i şəxsiyəti bə çəmə cıvonon yod bıdən.

Bə İrna raporti əsos, zinə Ostoro cımə İmom, Huccətul İslam Muhəmməd Cəvad Bağıri, Həzrəte İmom Xomeyni(r)-i mələkutiyə rehləti sorəqardışi təsliyət votışe iyən ıştə xotbəonədə əlovəş do: İmomi məktəbi təhrif kardey, ımrujnə ictimaədə təhdidonku qıləyni bə hisob omeydə. deşmən cəhdışe ki İmomi fik, şəxsiyət, iyən mudiriyəti metod iyən şivə təhrif ko, ta islamiyə inğilobi İlahi və muğəddəsə prinsipon və hədəfonədə şək-şubhə icod bıkə.

Əv ijən əlovəş do: əqə cıvonon iyən tojə nəsliro, İmom Xomeyni(r)-i şəxsiyət səhih surəti elan nıbu, deşmənon, həmonə İmomi ki pidəşone bə cıvonon elan bəkarden. Və həminə royədə ıştə həmmə səyo cəhdi əncom bədon və həmmə xarıci və daxıliyə əbzaronku istifodə bəkaden.

Huccətul İslam Muhəmməd Cəvad Bağıri əlovəş do: İmomi fik iyən inğilobi hədəfon, həmmə bə İlahiyə pokə fikon və Xıdo Rəsul(s)-i  təlimon əsose.