Rusiya tolışə diaspora təşkilaton Nəvuzə id ğeyd kardışone

Nəvuzə id həmə İronzəmini xalqon qiramiə adətonədə qıleye. Çəmə xalqon çand həzo sorone ki, ım idi de təntənə ğeyd kardedən. İm sor Tolışə Sipirişon Şura bə tolışə milləti ovarde, de Nəvuzə idi munasibəti əvonış təbrik karde. Moskvadə Tolışə diaspora təşkilati sərdar İsmail Şabanoviən bə tolışə milləti de Nəvuzə idi munasibəti təbrik votışe, bə çəmə milləti Nuə sorədə tojə muvəffəğiyyəton orzu kardışe.

Martə manqi 21 -minə ruji Moskva və Yekaterinburği tolışə təşkilati fəalon de Nəvuzə idi munasibəti şodmonə tədbiron dəvuniəşone. Rusiya paytəxt Moskva şəhərədə Tolışə təşkilaton  bə ico Nəvuzə idi tədbir de yoə əzəməti təşkil kardəşone. Bı şodmonə məclisədə tolışə diaspora təşkilati sədr İsmail Şabanovi, Tolışə mədəniyyəti inkişafi dastəq təşkilati sərdar Adil Nəsirovi, tolışə siyasi fəalonədə Muruvvət Ğurbanovi, Nurəddin Şiriyevi və  diqəron iştirak bəşone.

Yekarerinburğ şəhərədə Tolışə Mədəni Muxtariyyət təşkilatiən de Nəvuzə idi əlağədar ğıley məclis dəvunieşe. Bı tədbirədə Yekaterinburğ şəhəri tolışə ailon fəal iştirakşon bıe. Təşkilati sədr Elşən Həsənovi Nəvuzə idi məziyyəton həxədə qəp jeşe. Şəmşir Ğuliyevi məclisi iştirakəkon de ım qiramiə idi munasibəti təbrik kardışe. Şair Şirəli Nəbiyevi ıştə tolışə şeron handışe. Qədə tolışə balon tolışi zıvonədə şeron votışone, bımi qorə ıştə Nəvuzə hədiyyon seşone. Məclisədə xeyli miğdarədə tolışə mahneyonən ifa kardışone.