Almaniyədə jiyə Tolışon çe İğbal Əbilovi dərhol ozodətişon tələb kardə
Almaniyədə jiyə Tolışon çe İğbal Əbilovi dərhol ozodətişon tələb kardə
Almaniyədə jiyə Tolışon çe İğbal Əbilovi dərhol ozodətişon tələb kardə
Almaniyədə jiyə i qrup Tolışon çe Ozorboycon Respublikə Berlinədə bıə səfirəti vədə cəm bıə holədə,çe Tolışi mədəni fəol bıə İğbal Əbilovi beğeyd və beşərtə ozodətişon tələb kardə. Təxminən se manq bənav Tolışi nomdorə alim,Belarusi Beynəlxalğə Unversteti mellim, “Vestnik” qəzeti sər redaktor bıə İğbal Əbilov Boku həvo portəda de bə milli əmniyyəti zidd hərəkəti bəhonə,çe Ozorboycon Respublikə əmniyyət ğıvvon tərəfiku həbs kardey bıə.
Bə Səhab şəbəkə Tolışi kanali doə məlumoti əsos,i qrup Tolışon və huğuğ mıdofiyəçiyon Almaniyə poytaxt Berlinədə çe Ozorboycon Respublikə səfirəti vədə cəm bıən və çı İğbal Əbilovi həbsədə bey məhkum kardə holədə,Boku hukumətiku çın elmi iyən mədəni xadimi ozodətişon tələb kardə və bın barədə qıləy ğətnoməşon handə.
Piketi iştirokçiyon bın bəyonatədə bəştə torixi iyən insoni həxon,bə çın xalği çe Ozorboycon Respublikə mıstəğiləti və ərazi təmomiyyəti bə dast vardeyədə bıə xıdməton təkid kardəşone.
Bın ğətnomədə bə Ozorboycon Respublikə siyosi rejimi bənə Novruz Əli Məmmədov və Fəxrəddin Əbboszodə bıə Tolışi siyosi iyən mədəni məhbuson həbsi və kıştey anqıl torixi istinodən omə ki,bənə Aslan Ğırbonov,Ruslan Vəhabov və Rəşad Əhmədovi bıə şəxsiyyəton və çandə da qılə co şiyə tolışon ki,ısət çe Boku həbsxonəonədən,bəpe rəyrə ozod kardey bıbon.
Çın etıroz piketi iştirokçiyon Boku hukumətiku bə beynəlxalğə ğanunon rioyət kardey iyən çı kişfəri kanstusiyə icro ıştə co nıbə huğuğ hisob kardə holədə,çe Avropə Şurəku və çı beynəlxalğə hukumət iyən demokratikə institutonku xahişışon kardə ki,cari sori noyabrə manqədə Bokuyədə bərpo bıənin bıə çe İMT navədə omə İğlimi Əvəzon Konfransi (COP29) boykot bıkon.
