Peş II Ğərəboğ canqi İsraili bə Azərboycon siloh həvate həniən ziyod bə.
Azərboycon Respublika Prezident İlham Əliyevi yanvari 7-də bə televiziya kanalon musahibəş doə
Bə Tolışi Rədio raporti əsos, Azərboycon Respublika Prezident bın musahibədə bə vey mətləbon, əz cumlə Ermənistoni silahın be iddion iyən keşvəri sərdori təhdidon məğəmon qınə.
Əliyevi musahibəku kırtə sitaton: “Ermənistoni silohin be proses nuə təhdidi amile. Əmə bımi bənə muşahidəvoni diyə əkənimon.
Çəmə devlət budcə əhəmiyyətinə hissə bə hərbi iyən bo əmniyyətə məsəlon xarc bəbe… Ermənistoni silohın be bəhs, əməniən maliyyə resurson ğərəz əsos məsəlon bə hərbi məsəlon cəlb karde məcbur kardə.
Erməniston silohin be məsələdə de əmə rəğobət barde əzıni. Ermənistoni silohin be bə nuə konfrontasiya bəvarde bebakarde… Zənqəzur dəhliz oj bənine və oj bəbeyən. Əvon ımi çanəndə rə bə sə dəşon, ənəndə çok bəbe. Əvon bəpe əməni əsəbin nıkon…”De eksperton fiki iyo Ermənistoni nom qətə bıboən, ın mesajon həmən bə İroni unvon vığandə bən.
İsrail bə Azərboycono ən vey siloh həvatə keşvəri, məğsədən ğərəz ğəzənci, İroni təhdid kardeye. Im sori devlət budcədə ən vey vəsoit co kardə sahə mıdafiə iyən milli əmniyyətə xarconin. Bın sahon co bə xarcon bəsə dəvardə sorisə 18 % ziiyod kardə, bə 8,4 milyard mənot rosniyə bə.
Hiçən sırr ni ki, İsrail oxonə 25 sorədə de Azərboyconi strateji mıttəfığəti kardə, bə Boku de milyard dollaron siloh həvatedə. Çımi mığabilədə Azərboycon İsraili de Turkiyə ro de nati təmin kardə, bə İroni vəynə beşe imkon soxtedə.
Azərboycon İsraili bə nati bə tələbatı təxminən 40 faizi təchiz kardə. İsrail Azərboyconi nati de Turkiyə Ceyhan terminali vasitə hələ 1990-minə soronku hıridə.
De eksperton fiki İsrail 2016-2020-minə soronədə Azərboyconi siloh sənaye 70 faiz təchizış kardə.Peş ll Ğaraboğ canqi de İsraili nufuzinə “Haaretz” qəzeti nıvışte, İsrail aviabazonku bə Azərboycon 92 siloh ixroc kardə reys oşko kardə bə.
Rəsmi doə məlumotonədən ğeyd bedə ki, Azərboycon İsrailku ən muasir siloh sistemon, əz cumlə ballistik raketon, həvo hucumonku mıdafiə iyən elektron sistemon, kamikadze dronon və s. hıryəşe və holiədən ım dəvom kardə.
De bardə tədğiğton, Azərboyconi “Silk Way Airlines” aviaşirkəti bo təyyaron Eylati şimolədə İsrail Hərbi Həvo Ğıvvon “Ovda” bazaku 2024-minə sori bə Azərboycon de hərbi məqsədi 25 kərə reys karde bəlli bə.Oxonə 9 sorədə 135 kərə joğo reyson bən.
Ğərəz bımon Təl-Əvivikuən bə Azərboycon de hərbi məğsədli reyson kardə bedən.
Ponə sori Pakiston, İtaliya, Serbiya iyən Bolqarıstoniku de “Silk Way“, “İlyuşin-76” iyən “Antonov-12B” təyyaron de hərbi məğsədli siloh tədoruki ro 10 kərə reys karde məlum bə.
Məlumoton “Flightradar24” sayti istinod qırd kardə bən. Həmməyəvo ponə sori bə Boku 40-sə ziyod siloh reyson kardə bənBın reyson miğyasi nəzə səğandeədə, Azərboyconi bə nuə eskalasiya hozzo be ehtimol kardə bedə.
In eskalasiyon siqnalonən Əliyevi votəyonədə muşahidə kardə bedən.
