PKK vadoe elon kardə bə

Kırdiston Fəhlə Partiya (PKK) çe silohinə fəoliyyətiku dast kəşe və təşkiloti vadoə be elonış kardə. In ğəror, təşkiloti 12-minə qırdemonədə ğəbul kardə bə və çe Abdullah Ocalani tərəfo kardə ovardemoni cəvob bə jimon dəvonə bə.

May 12-də pevolo bə bəyonatədə, PKK 40 sorinə silohinə mıbarizə “tarıxe missiya” bə orəx rəse və kırd məsələ demokratik siyosət çərçivədə həll bə mərhələ ovaşte bəyon kardə bə.
“Bın mərhələdə Tırkiyə Yolə Millət Məclis ıştə tarıxe məsuliyyəti bə vırə rosniye vey vocibe. Parlamentədə təmsil bə həmmə siyosi partiyon, ələxsus hakimiyyət və əsos mıxalifət, həmən vətəndor cəmiyyəti təşkiloton sulh və demokratik cəmiyyəti onemonədə çəvon səpe eqıniyə ğarzi bə vırə rosniyənin”,  – bəyonatədə ğeyd kardə bə.
Ocalan 1999-minə soriku Tırkiyə İmrali cəzirədə dastqirətiədəy və çəy ovarde, təşkiloti çe silohinə mıbarizəku dast kəşe və siyosi həll ro vıjniye tələb kardə.
Navkoən, 2000 minə soron sıftədə PKK tərəfo təşkiloti vadoe barədə ğəror doə bəbe. Bəvədə Tırkiyə hokuməti bəvon kardə təzyiğ iyən təhdidon nəticədə təşkiloti ıştə fəoliyətış bərpo kardə be.
PKK de kali şərton marti 1-də itərəfinə otəşvəs elon kardəşe. Çın şərtonədə qılıən, sulh muloğaton ro huğuği baza onoeye.
PKK 1980-minə soronku de Tırkiyə silohinə mıborizə bino kardəşe. Sıftə mıstəğıl Kırdistoni ro mıborizə bardə təşkilot, oxonə soron məğsədış bə mıxtəriyyot və bə kırd vətəndoron həniən vey huğuğon doe əvəz kardəşe.