Şəhid Rəyisi çı meydoni simvol iyən cihodiyə mudir be
Qiloni vali şəhid Ayətullah Seyd İbreym Rəyisiş çe meydon və cihod idorəçəti simvolış hisob kardə.
Rəştədə cımə nımoji xutbəon bənav nıtğ kardə Hadi Həxşınos mərhum prezdent,şəhid Ayətullah Seyd İbreym Rəyisi xatirəş de ehtıromi yod kardə holədə votəşe:Şəhid Rəyisi vey səy kardə,fəol və praqmatik qıləy prezdent be və 2 sorisə bəkam qıləy mıddətədə bo xalği problemon həlliro və de diplomatikə əloğəon inkişofi məğsədi 48 kərə bə əyoləton iyən 26 kərə bə xarici kişfəron səfəş kardə.
Qiloni ostandor bə Şəhid Rəyisi reqiyonal diplomatiyə sahədə bə dast vardə noiliyyəton işorə kardə holədə votəşe: İron bın devrədə bənə bə Şanxay Həmkoəti Təşkiloti və BRİKS-i bıə muhimmə beynəlxalğə mığoviləon omuj qıniyə.və holin ki,İslomi İnğılobi bənav fəğət çe iqlə reqiyonal sazişi uzv be.