Afiəddin Məmmədov dastqirətiədə təhdid kardə bedə

“Kodorə Miz” Həmkoə İttifoğon Konfederasiya dastqirətiədə bə sərdor Afiəddin Məmmədovi bə təhdidon məruz mande barədə Konfederasiya iyuni 6-də pevolo kardə məlumotədə votə bedə.

De konfederasiya pevolo kardə məlumoti, Afiəddin Məmmədov holiədə oğətə 2 numrəninə Cəzokəşə Muəssisə rəhbərəti tərəfo həniən bə qonə rejiminə muəssisə ovoştone tars omə bedə.
Məlumotədə ğeyd kardə bedə ki, Afiəddin Məmmədov bı nezıno mandə 2 numrəninə Cəzokəşə Muəssisədə antisanitar vəziyyəti barədə bə ictimaiəti xəbəş doə.
Afiəddin Məmmədovi bə ıştə xeyzoni vığandə və may 29-də pevolo kardə məktubədə votə bedə ki,  2 numrəninə Cəzokəşə Muəssisədə 250-sə vey məhbuson ro cəmi 4 sanitar vırə hıste.
Mətbəxədən morəon sərbəst nəvedən, ərzaq ğotiyon hıl kardən.
 Kamerada məhbuson hisob normasə ziyode və çəy ictimai kardə məsəlon de ictimai-siyosi fəolon band nin, de həmmə məhbuson həxon anqıle.
Afiəddin Məmmədov 2023-minə sor sentyabri 20-də dastqir kardə bə və de Cinoyət Məcəllə mıxtalif maddon bo əy 8 sor dastqirəti cəzo bırniyə bə. Əv ıştəni qınoko zınedəni, ittihomon pesoxtə be iddio kardedə.