NATO mıttəfiğon bə Trampi ultimatumi çokonə cəvob bədon?
NATO mıttəfiğon bə Trampi ultimatumi çokonə cəvob bədon iyən kom tədbiron bəvindeyn?
NATO mıttəfiğon bə Trampi ultimatumi çokonə cəvob bədon?
AİŞ prezdent Donald Tramp de Rusiya bıə canqədə bə Ukrayna dastək doe dəvom doeyro nuyə şərtonış təyin kardə.
Donald Tramp “TruthSocial” sosyal şəbəkəonədə ıştə postədə nıvıştəşe:“Mı bə Rusiya ələyhı dıjdə sanksiyaon tətbiğ kardero hozzım,de ın şərti ki,qırd NATO uzvon eyni çi ğəbul bıkon və həmmə NATO kişfəron Rusiyaku nati hıriye oqəton”.
Trampi bənə bə “qırd NATO kişfəron və bə dınyo” nomə unvoni tevsif kardə bəyonot fəğət qıləy diplomatikə təhdid ni,həmən bəştə Ğərbi mıttəfiğon qıləy ultimatum həm bə hisob omeydə.
Tramp çe NATO bəzi uzvon Rusiyaku nati hıriye “şokəkə” zınəşe və əlovəş kardə ki,NATO behronədə ğalib omey ehdəmon “100 fayizisə bəkame”.
Im mətləb,Ukraynadə bıə muharibədə ziddiyyəti ziyod bıə iqlə vaxtədə bə əməl omə.çandə ruj çımi bənav bə Polşa həvo məkoni daxil bıə çandə qılə Rusiya bepilotə təyyorəon çe NATO canqəkə ceton(canqi təyyorəon)tərəfiku eğandə bıən.
Rumıniya həm xəbə doə hodisə bo NATO çe həyəconi təblış jeyə.Bımi cəvobən Tramp ləpi bə AiŞ-on mıttəfiğon meydoni ğandə holədə,votəşe ki,çanədə NATO mutəğobilə qəmon nışodo,AİŞ-on bə Rusiya zidd nuyə sanksiyaon icro iyən tətbiğ nibəkarde.
In nəzə ki,bə Rusiya təzyiğ və AİŞ mıttəfiğon tənğıdiku qıləy tərkibe,bə Trampi torixi bob omeydə.zira əv,mutəmodiyə surətədə bə NATO kifoyət ğədərədə bo mudofiyə xarc nıkardey xoto hucum kardedə və əy tənğıd kardedə və ısət Şərği Avropadə bə əməl omə nuyə hodisəonku ıştə ixtisodi və hərbi məğsədon bə həyot dəvordıneyro istifodə kardero səy kardedə.
Bə Ğərbi 2022-ə soriku tətbiğ kardə hevujə sanksiyaon rəğmən,Rusiya bə seminə kişfəron nati həvateyku dıjdə bəromə bə dast vardey ko dəvom doydə. Bə Enerji və Pokə Həvo Təhğiğoti Mərkəzi məlumoton əsos,NATO uzv bıə Tırkiyə çe Çin və Hindıstoni bədiqə çı Rusiya nati hıriyə seminə həmməysə dıjdə mıştəriye.Macarıston və Slovakiya həm çe Moskvaku enerji idxaliku bəşıkrəy.
Tramp jıqo hisob kardedə ki,NATO uzvon tərəfiku Rusiyaku nati hıriye təmomən oqətey və bə Çini (ki,çe Rusiya nati hıriyə əsosə mıştəriye) 50 tosə 100% rusumon tətbiğ kardey,çı “Çini bə Rusiya zumandə nəzorəti” darıştey və bə Ukraynadə sulhi bə əməl omey boyis bəbe.
De ın holi,Trampi çe NATO uzvon tərəfiku Rusiya nat iyən ğazi hıriye bəkam kardey və həmən bə Çiniku idxali qonə tarifon tətbiğ kardey təklif,de ziyodə muşkiloton bəico bəbe.Məsələn,de Moskva veyə nezə əloğəonış bıə Tırkiyə ğane kardey və çəyku çe Rusiyaku nati idxali oqətey tələb jəqo həm hoston nibəbe.həmçinin çe Avropə İbemoni uzvonku kali qıləyni həm ki,çe NATO uzvonin,2024-ə sori çe Rusiyaku təxminən 42 milyard dollarinə molışon idxal kardə.ım qıləy holədəy ki,Rusiya hələm çəvon bə təbiyi ğazi bıə tələboti 10%-i təmin kardedə.
