AİŞ nımoyəndon bə Azərboycon səfər
Yanvari 4-də Azərboyconi Prezident İlham Əliyevi AİŞ nımoyəndon ğəbul kardəşe. De doə məlumoti, vindemonədə bə dıtərəfinə əlağon, regional proseson və əmniyətəti məsəlon qınə bən.
AİŞ nımoyəndon miyonədə Senati Silohinə Ğıvvon Komitə uzv, respublikador senator Markveyn Mallin, Nımoyəndon Palata uzvon – respublikador Ceyson Smit, Ronni Cekson və demokrat Cimmi Panetta bən. Əvon ponə sori avqustədə amerikadə omə Azərboycon-Erməniston roziəti ro Əliyevşon təbrik kardə.İlham Əliyevən həmonə roziəton “tarıxe” be və bın prosesədə AİŞ Prezident Donald Trampi rolış məxsusi ğeyd kardə. Əliyevi, bə Erməniston çe Ğazaxıston və Rusiyaku vığandə molon de Azərboyconi ərozi tranzit be və TRIPP nəğliyyat dəhliz bo reqioni nuə imkonon soxte umu karde votəşe. Əliyev AİŞ bə “Ozodəti Dastək Akti” 907 bəndi ləğvi səmtədə qəmon şodoe vocib be bəyonış kardə.Tərəfon ğərəz siyosi və iğtisadi həmkoəti, enerji, mıdafiə və mıdafiə sənaye, təhsil, informasiya texnoloqiyon və suni intellekt sahonədə əlağon her-hevuj karde barədə mulağaton bardəşone.AİŞ nımoyəndon səfəri çərçivədə de mıdafiə vəziri Zakir Həsənovoviən vindemonşon kardə. De Mıdafiə Vəzorəto doə xəbə, vindemonədə Azərboycon–AİŞ hərbi və hərbi-texniki həmkoəti holiədə vəziyyət, hərbi təhsil sahədə əlağon və perspekton mızakirə kardə bən.
