Yolə Rəhbər: İroni millət çı xarıcion niyobəti muzdoron tov nibəvarden

Həzrət Ayətullah Xameneyi de Ğomi milləti vindımonədə votışone: İroni millət çı xarıcion niyobəti muzdoron tov nibəvarden.

Bə İRİB raporti əsos, Yolə Rəhbəri hamiyəşone: zinə şəv Tehron iyən kali vərəonədə i dastə xərobəkə odəmon omin və ıştə kişvəri təsisot və binaon xərobə kardışone ta Amerkə prezident xoş bıbu, boçi ki əv qıləy berəbtə sıxanonədə votəş be, əqər İroni dıvlət jəğo bıko az bomım və ironi milləti tərəfi bəqətım, peşo iyo həm iğtişoşəkəyon iyən bo İron zərəl-ziyonışon bıə kəson dıl bəçəy sıhbəton xoş mandəy.

İroni Yolə Rəhbəri əlovəş karde: ın şəxs votışe ki az əmr kardıme iyən canqi fərmondə bim, çən etırofış kardə ki çəy dast İroni milləti xunədə aludəy, peşo votedə ki az İroni milləti tərəfdorim, i dastə betəcrubə, bediğğət və fiknıkardə odəmon həm bovə kardən, ğəbul kardən iyən bəçəy vote əsosi əməl kardən, zibili vedrə otəş jedən ta əv xoşhal bıbu.

Həzrət Ayətullah Xameneyi hamiyəşone: həmməy kəson bıznon ki İron İslom Respublika nizom de çand sa həzo şərofətinə insonon xuni icod bıə iyən in nizom xərobəkə kəson vədə bə domu nibənışte, xarıcion niyobəti muzdoron tov nibəvarde, şımə har kəs ki bıbən farğ kardəni, bo xarıcion muzdorəti kardey, bo xarıcion ko kardey bəpeşt millət şıməni mərdud zıneydə, İslomi nizom həm şıməni tov nibəvarde.

İroni Yolə Rəhbəri votışe: ə şəxs ki de yoləşəxəti kardey əyo nıştə iyən dınyo həmməy vırəon barədə sıhbət kardə, bəpe bızno ki bənə Firon, Nəmrud, Rızaxan iyən Muhəmədrıza Pəhləvi bıə mıstəkbiron jəğo ovcədə bıə yoləşəxətion vəziyətədə suğut kardışone və məhv bin, ın şəxs həm məhv bəbe.

Ayətullah Xameneyi oxoysə təkidışon karde: əzizə cıvonon, çı kişvəri inkişof və ozavziyeyro ıştə din, siyosi fik, iştirok, hozzıəti iyən ciddi mandey oqətən, ıştə vəhdəti oqətən, boçiki i bıə vahidə millət har dışmoni vədə səbarz bəbe.