Pars Today

Şiiə yolə alimon

Hicri-Ğəməri 1248-ə sori Ğomi alim perosnə iyən mığəddəsə şəhri nezi Aştiyani məntəğədə qıləy zoə hırdən bə dınyo çəşış oj karde ki,çəy nom Muhəmməd Həsən noşone.Muhəmməd Həsən Aştiyani həm bənə Mirzayi-Şirozi se sinnədə beyədə ıştə təğvaninə pış çı dasto doe və yətiməti təmış çaşte.əmmo əv ıştə pərhizkor iyən Əhli-Beyti(ə) aşığə mo tərbiyə jiyədə ıştə jimonış de dini maarifon təlim vindey dəvomış doe.çəy mo əvış çı alimon məhzərədə bo dini elmon təhsiliro Aştiyanədə çı alimon palu vığandeşe.və Muhəmməd Həsən tosə senzə sori həmonə diyorədə çı uləma palu de dini mığəddimə dərson omutey koy məşğul be.çəy bəpeştə boştə dini təhsili idoməro bə Burucerdi şəhri şe.bə zəmon Burucerdi elmiyyə hovzə çı şiyə alimon həmməysə məşhur iyən fəolə alimon mərkəz bə hisob omeydəbe.əv Burucerdi elmiyyə hovzədə fiğh iyən usuli dərsonış de tosə ostadəti həddi təlimış vinde və haftə sinni bənav bə tədrisi kursi nışte.qıləy holədə ki,çəy şoqirdon adətən sinnış bəpe bıə tələbəon bin və çəy palu dərs handedəbin….

Mirzayi Aştiyani hafdə sinnədə de mıttəğiyon mevla bıə həzrət Əli(ə) həmcivor iyən hamsuyə bıey şevği iyən boştə dini elmon təkmil kardero bə Nəcəfı-Əşrəfi səmt hərəkətış karde.əy ın səfə zəmonədə de ziyodə məşəğğəton dimbədim ome.ın havdə sornə nevcıvon de əziyyəti pur bıə bın səfə royədə ki,çı veyə şəhr iyən biyabononku dəvardedəbe,roy nimədə bə saxt və şiddətinə noxəşəti mıbtəlo be.əmmo dini elmon omutey iyən bə Əhli-Beyti(ə) xıdmət kardey həvəs bəy ıştə royədə hərəkət kardey ğıvvəş doe və bəy qıləy məxsusə şevğış baxş karde.Mirza de qıləyu zəyifə bədəni iyən təb-larzış bıə holədə bə Əmirəl-Muminin həzrət Əli(ə) barqo iyən hərəmi rəse və qıləy holədə ki,çı mıttəğiyon mevla hərəmi ziyorəti əvış bə vəjd vardəşbe,bə hərəmi iqlə quşə və kınci pənohış barde və bo dini maarifi kəsb kardero və həmçinin boçəy ın muşkilot iyən noxöşətiyon bərtərəf kardero çə həzrətiku dıvoş və tələbış karde……

Cıvonə Mirza çı təvəssıl iyən ziyorəti bəpeştə həzrət Əli(ə) baqoku bə bi ğədəmış noe ta de məşəğğəti pur bıə təhsil iyən jimoni ıştə xıyzon iyən vətəniku çandə sa kilometr diyəroədə binoko.əv ğərəz həzrət Əli(ə) ziyorəti çın şəhri həmmə vıronədə ğurbəti hissi dəvordıneydəbe və çəy noxəşəti əziyyəton çəy ğurbəti ğəmış tiki həm ziyodış kardə.həzrət Əli(ə) ziyorətiku xaric bıə zəmonədə çı qırd ğəribə insonon miyono de İlahi lutfi deştə pı kanə dustonku qıləyni dimbədim ome ki,çandə dırozə soron Nəcəfı-Əşrəfi şəhrədə sakin be və bın şəhrədə jimon kardedəbe.ım ğədimi oşno ki,çı Muhəmməd Həsəni dindorətiku bə vəjd oməbe,əvış bəştə hucrəş barde və çəy asayiş iyən təhsili şərayitış hozzı karde.bə intizori əks çı cıvonə Mirza noxəşəti qıləy kırtə mıddətədə çok be və ıştə Nəcəfədə bıə təhsili devronış bino kardeyış zıne və çı şeyx Murtəzo Ənsari dərsonədə iştirokış karde.şeyx Murtəzo Ənsari Hicri-Ğəməri senzəminə əsri həmməysə barzə məğaminə alim iyən məşhurə fəğih  bə hisob omeydəbe…….

Nəcəfı-Əşrəfi elmiyyə hovzəonədə çı Şeyx Murtəzo Ənsari şoqirdon həmmə çı Muhəmməd Həsənisə vey yol bin.joqo ki,əv bəştə cıvonəti dəlili xoto həyo kardedəbe və çı pardə peştono nışteydəbe və bəştə ustodi sıxanon quş doydəbe.iruj Muhəmməd Həsəni qıləy sıvoliku bəhsış karde..Şeyx Murtəzo Ənsari çı Aştiyani cıvonə mıtəfəkkirə tələbə sıvoliku bə vəjd ome və dərəse ki,ın tələbə çanədə bə elm iyən təfəkkuri təsəllute və çəy elmi dərəvcəku aqah be.çəy bədiqə Şeyx Murtəzo Ənsari bə Mirza qıləy xısusi dığğətış nışon doe.Mirza bənə çı Şeyx Murtəzo Ənsari xısusi tələbə unvoni bəçəy kə şıey-omey kardedəbee və Şeyx Murtəzo Ənsari bəm ıştə şoqirdon boştə işkali və elmi bəhson dərəseyro çəy palu vığandedəbe.Muhəmməd Həsən bəştə reçinə bəyon iyən yaddaşton xoto çı Şeyx Murtəzo Ənsari dərsonədə de şeyxi lisani və zıvoni nomi məşhur be……