Dəvardə 45 sori mıddətədə daxıli siyosəti baxşədə İroni muvəffəğiyəton

əzizə əməson səlom, şımə ruj bə xəy bıbu, az Səidi ımrujnə xəbə təhlil baxşi bə şımə təğdim bəkam, çəy məseyro dəmə bə ico bımandən, əzizon, Dəvardə 45 sori mıddətədə, daxıli və xarıci siyosəti baxşədə, İron İslom Respublika veyə muvəffəğiyəton şoyh be.

Daxıli siyosəti baxşədə İron İslom Respublika vey muhimmə muvəffəğiyətonku qıləyni, dini demokratiya metodi nışo doey be. tosə İslomi İnğilobi səbarzəti bənav, bə İron şah  nizomi hakim be ki çəy dəvom iyən oqətey vey muhimmə əbzaron, bə istebdodi təkyə kardey be, əmmo de İslomi Respublika hakim bey, İronədə demokratiya nizom rəvoc peydoş kardə ki çəy vey muhimmə doktorin, bə milləti sədo iyən bə ilohi ğanun əməl kardey təkid be.

İcroiyə, ğanun noey və məhkəmə ğıvvə icod kardey bənə demokratiya nizomon vey muhimmə amilon, 40 qıləku vey de tərtibi səçın bərpo kardey, mədəni, iğtisodi, siyosi muxtəlifə baxşonədə ğərol qətey və icro kardeyədə mıstəğil bey, bə millət rəsmi şəxson cəvob doey, siyosi qrupon və ictimai cəmiyəton rovnəğ doey, ımrujnə İroni ictimaədə demokratiya zumandəti bə hisob omeydə.

İslomi Respublika karde zınəşe din və siyosət baxşonədə mıtəğabilə əməlon oşko bıko və qıləy siyosi nizomi icod bıko ki həm bə siyosi və mənəvi xusiyəton ğoyme və həm de demokratiya metod və İslomi erjon miyono anqıl qıniye təkyəş heste. jığo hukuməti metod həm bə hukuməti respublika bey və  hukuməti ğərol qəteyədə bə milləti rol təkid kardedə, və həm bə İslom meylış bıə ulquon iyən islomi stabilə erjon yəni ədolət, Xıdo mehvəri və mənəviyət təkidış heste, və ım çiyon bənə siyosi nizomi əsos zıneydə.

Əqəçı cumhuriyət iyən İslomiyət İslomi inğilobi 2 qılə vey muhimmə amilonin əmmo yandeku co nin, və har qılə co qılə təsdiğ kardedə. Həzrəte Ayətullah Xamenei həminə barədə etığadış heste ki: nizomi har 2 qılə İslomiyət və Cumhuriyət bə səçın vabəstəy, boçi ki cumhuriyət iyən demokratiya bə vırə rosniye iyən kişvəri idorə kardeyədə milləti hakımiyət fəğət səçın bərpo kardey royku icod bəbe.

Siyosi baxşədə mıstəğil bey həm dəvardə 45 sori mıddətədə İroni İslomi Respublika vey muhimmə muvəffəğiyətonku co qıləyni be. qıləy holədə ki tağut rejim hiç qılə səth və baxşədə mıstəğil nıbe, İslomi Respublika deştə mıstəğil bey və anti istebdodi zoti vositə, bə İroni milləti sərnıvışt xarıcion sultə inkorış kardə və beynəlxalğə nəzmədə behron icodış kardə.

İjən de məntəğə və dınyo co kişvəron muğaisədə, İslomi Respublika nizom, veyə mıstəğil bey soybe.

Həğiğətədə de İroni İslomi Respublika, ğərbi ğudrəton xususi Amerkə deşmənəti iyən zalımonə sanksiyaon icod kardey  vey muhimmə illəton, İroni siyosi mıstəğil bey bə hisob omeydə.

Bumi əmniyyəti soyb bey və əmiyyəti cəhəto, bə xarıci ğudrəton vabəstə nıbey, dəvardə 45 minnə sori mddətədə daxıli siyosəti baxşədə vey muhimmə muvəffğiyətonku co qılə bə hisob omeydə be. qıləy holədəyə ki Asiya ğərb məntəğədə kişvəron əmniyyət əcumlə məntəğə kali ğudrəton həm bə xarıci himoyəton vabəstəy və hətto çəvon təhğir bey bois bıə.

Əzizə duston bə xəbə təhlil baxşi quş doey xoto şıməku təşəkkur kardəm, dəvət kardəm bə Tolışi Rədio bərnoməon dəvomi diğğət kənən.