Eşği şayir

Hafiz qıləy şayir be ki,de məfhumi pur bıə iyən bə dıl nıştə ğəzəlon,har qıləy mıxotəbi dıli təsxir iyən rom kardedə.çunki,çe mırəkkəbə məfhumonku sıxan votedə

Hafiz qıləy şayir be ki,de məfhumi pur bıə iyən bə dıl nıştə ğəzəlon,har qıləy mıxotəbi dıli təsxir iyən rom kardedə.çunki,çe mırəkkəbə məfhumonku sıxan votedə.əmmo de qıləy zıvoni sehbət kardedə ki,bo həmmə kəson dərk bıənine iyən bə həmmə kəson dıli nışteydə.çe Hafizi şeeron vey vaxti çe ğəzəli ğəlibədə iyən irfoni şikilədə bo Hafizi hisson iyən təfəkkuri İfodə iyən bəyoniro vey çokə zəminə iyən platforməy.əv,de qıləy sodə zıvoniku oko doey iyən eyni holədə de məno pur bıə məfhumon,kardeyış zınə vey mırəkkəbə fəlsəfi iyən irfoni məzmunon de vey mumkinə şivə bə təsvir bıkəşo.Hafizi şeyronədə eşğ iyən irfon bəyənde omuj qıniyə və ın şayir de orijinalə alleqoriyə və təmsilon iyən təsvironku istifodə kardey,irfoni iyən fəlsəfi nığılə məfhumon de reçinə şivə bəyon kardeyış zınə.

Hafiz min cumlə çə şayironkuye ki,irfonış de qıləy barzə sənətkoəti şikili və eyni holədə  bə həmmə kəson xoş omə formədəıştə şeyronədə okoş doə.Hafizi şeeronədə irfon həyğəti dumo nəvey iyən İlahi zoti zıney mənoədəy.əv,dınyo qıləy ovəynə zıneydə ki,İlahi cəmol iyən cəloli inikas və əks kardedə iyən insoni bə ın həyğəti rəseyro,de rəmzo-sırron pur bıə qıləy royədə ğərol doydə.Hafiz bə farsi zıvon iyən ədəbiyyoti mukəmməl zıney iyən təsəllutisə əlovə,de ərəbi iyən tırki zıvonon həm oşno be və ın ko bəy ın imkoni doydəbe ta ıştə şeeronədə çe mıxtəlifə mənbəonku bəhrə bıbo.

Hafizi şeeronədə eşğ,çe zəmini rabitəsə nığıl bıə qıləy mənoş heste.əv,eşği bə həyğəti səmt bıə qıləy ro zıneydə.qıləy həyğət ki,insoni bə Xıdo vey kardedə.həyğətədə,Hafiz eşği şayir,həyğət iyən ozodəti şayire.çəy şeeron əməni bə qıləy dınyo bardedə ki,bəvədə eşğ iyən mərıfət ,çe Xıdo iyən çəy ıştəni zıney iyən mərıfəti kilide.əve har kərə ki,əmə bəçəy şeeron rucu iyən ovard kardedəmon,qıləy tojə sıxan iyən nəzə vindedəmon.ə cumlə çe Hafizi coqlə əsəron həmməysə muhimmə xıslətonku  ki,bəçəy dınyo səviyyədə qıləy şehrəti bə dast vardey boyis bıə,çəy bəyoni reçinəti iyən məno nığılətiye.

Hafiz de şivo iyən bəloğətin iyən de məno pur bıə zıvoni,irfoni məfhumon de qıləy formə bəyon kardedə ki,həm bo umum mıtoliyə kardə və handəkəson və həmən bo əndişə soybon famənin iyən dərk bıənine.əv,deştə ğəzələon nəyinki,çe İroni mərdumi dılonədə,bəlkəm qırd dınyo milləti dılonədə qıləy vırəş qətə və bənə eşğ iyən irfoni simvoli unvoni,ijən həm bə şeyr,ədəbiyyot iyən şayiron qıləy ilhom baxş kardedə.dınyo mıxtəlifə kişfəronədə çe Hafizi məğam bənə eşğ iyən irfoni simvoli unvoni zıney beydə və çəy əsəron bə dınyo mıxtəlifə zıvonon tərcumə kardey bıə. bənə Almaniyə,fransə,inqiliston iyən amerkə kişfəronədə çe Hafizi əsəron Ədəbiyyot iyən Miyonə Şərği fakultəonədə Akademikə bərnoməonku iqlə baxşe.həmçinin ğərbədə bənə Qote,Emerson iyən Hayne bıə yolə şayiron iyən mıtəfəkkiron çe Hafiziku təsirışon peəqətə və çe Almaniyə məşhurə şayir bıə Qote,Hafizi bənə bəy ilhom baxşəkə şəxsi unvoni ğeyd kardedə…