Nasiyonali Muəllifi Imrujnə İroni Həxədə Seqlə Təhrifon

 Nasiyonali(The National) veb sayt 12 noyabr torıxədə qıləy məğolədə çe İron İslom Respublika de israyili oxonə canqi bədiqə de millətçiyəti zumand kardey iddiyo torıxi və mifik simvolonku istifodə bıə nəzə əvəzbemoni ıştə perspektiviku bərrəsi kardedə.

Bə Pars Tudey doə məlumoti əsos,"İron iyən de israyili oxonə canqi bədiqə bo millətçiyəti zumand kardey xoto de bə ğədimə torıxi oqardemoni" nomo bın məğolədə muəllif İrondə bıə oxonə hodisəonış bə ğədimə torıxi və millətçiyəti oqardemoni şikilədə izoh kardero cəhdış kardə.Bın məğolədə muasirə İroni realəti həxədə səhfə təsəvvır icod kardə təhrifon heste.Jintono çın təhrifon seqlə vocibə numunə vardey bıə.

1-Millətçiyəti sırfən bə siyosi qıləy vositə kam kardey

Muəllif iddiyo kardedə ki,İslomi Respublikə fəğət ənənəvi İslomçiyəti cozibə bə kam bey xoto bə millətçiyəti dimış qətə.məsələ ın cur famey qıləy təhrifamizə nəzəy.Əvvəla,İslomi İnğılobi nəzədə vətənpərvərəti orzu bıə qıləy çiye.İron İslom Respublikadə vətənpərvərəti,millətçiyəti ne,fəğət siyosi vositə ne,həmən cəmyəti mədəni və torıxi kiyəti qıləy hissəy. Bənə Şapur və ya Tiyğandə Arəşi bıə ğədimə simvolon istifodə fəğət bə siyosi şərayiti reaksiya ni,çımi əks çe xalği de İroni torıxi irsi bıə nığılə əloğə əkse.Əslədə,İron vətənpərvərəti həmişə çe İslomçiyəti kəno mevcud bıə və ım dıqlə kiyəti ibemon çe İslomi Respublika intellektual strukturış bə forma dənoə.Çımonku əlovə,İron İslom Respublika hejo bə vətənpərvərəti məsələ təkid kardedə.

2-Torıxi simvolon təkrori istehsolədə xalğon roli nəzədə nıqətey 

 Mıəllif ğədimə simvolon istifodə fəğət qıləy hukuməti loyihə bey ilğo kardedə.Im nəzə qıləy təhrifamizə nəzəy,çunki İroni millət ıştən çın simvolon mıhofizədə və təkrori istehsolədə qıləy dıjdə rol ifo kardedən.Bə Nəvuzi və ya bə Yolə Koruşi,çe Əhəməniyon podşo və ya bə Perspolisi iştimoyi həvəs nışon doydə ki,ğədimə millətçiyəti nəyinki pentoniku tətbiğ kardey beydəni,bəlkəm həm bə qıləy populyarə mədəniyyəti əsose.Harçand bənə Tehroni İnğılob Meydonədə Sasaniyon I Şapuri navədə zonusə nıştə Roma imperator Valeriyani heykəli noey bə ın simvolon veyə dığğət nışon doey həm bıbu,bə ın simvolon təkid kardey bəzıneyn,lakin ım sosyal kontekst çımi bənav həm mevcud be.

3-Nizomi bə ğədimə torıxi nəzə vohid və mənfiyə obrazi təğdım kardey

Muəllif çe İslomi Respublikə dayima ğədimə torıxi etosney və ısət ğəflətən boştə kursi əvəz kardeyro səy kardeyku nıvışteydə.Im obraz təhrifamzie.Realəti ıme ki,İslomi Respublikə bə ğədimə torıxi nəzə hejo dıcurnə bıə:istibdodi iyən avtoritarə aspekton tənğıd kardey,eyni zəmonədə mədəni və bədiyi noiliyyəton ğəbul kardey.İslomi İnğılobi lider Ayətullah Xameneyi çandə dəfə bə ğədimə İroni memorəti və bədiyi erjon istinod kardə holədə,bə İslomi əxloği və mənəvi aspekton təkid kardəşone.Ə həzrət ıştə nıtğonədə Sasaniyon və Həxaməneşi(Əhəməniyon)çandə dəfə bənə zolımkorə rejimon tənğıd həm bıko, çəvon bəzi noiliyyətonış çe "İroni ğurur" hisob kardedə.Roma imperator Valeriyani Kazerunədə çe Sasani kral I Şapuri vədə bəsə zonusə nıştey barzə rol çe İslomi İnğılobi Ali Rəhbəri Həşi 1387-ə sori Ordivəhıştə manqədə(2008) bə Farsi əyoləti bıə səfə zəmonədə de əyoləti icra hakimiyyəti rəsmiyon bıə didoədə əy bə xalği nışon doey təkid kardə role.Həmonə didoədə bə bəzi kişfəron suni torıxi şehrəti icodi səyon işorə kardə holədə təkidışon kardə:İroni milləti torıxi əslə fəxr milli bəştə bovə hissi zumand kardedə və lozıme bımi veyə dığğət kardey bıbu.Əve həm,İron İslom Respublikədə bə torıxi irsi dığğət rosney sahədə oxonə tədbiron qıləy ğəfləti oqardemon ni,bəlkəm həmonə tərkibi və tədrici nəzə dəvome.

 Nəticə

Nasiyonali təhlil de seqlə əsosə təhrifi pure:millətçəti bə siyosi avjori peqordıney,torıxi simvolon təkrori istehsolədə xalğon roli nəzədə nıqətey və İslomi Respublikə bə ğədimə torixi nəzə vohidə mənfiyə imici təğdım kardey.In təhrifon mıosirə İroni notəmom və ğərəzinə mənzərə vardedə,qıləy holədə ki,realəti çımisə həm mırəkkəbe:İroni vətənpərvərəti bə populyarə mədəniyyəti əsose,de İslomçəti inteqrasiya beydə və rəsmi siyosətədə bənə qıləy milli kiyəti iqlə hissə istifodə beydə.