Ğəzzə Jenon İnəti İslamofobiya Kambeyədə bıə Rol

Pars-Tudey-Jenon və Xıyzoni Tədğiğoton İnstituti akademik şura uzv çe Mığoviməti şəhidon inon roli "şəhidə inəku" bə "milləti inə"çokonə əvəz bey və ımi boştə qıləy qlobal missiya hisob kardeyış izoh kardə.

Bə Pars Tudey doə məlumoti əsos,Ğəzzə canqi bino bey sıftəku bə"muharibədə bıə jenon" məsələ xususi dığğət rosnə Qadın Jenon və Xıyzoni Tədğiğoton İnstituti akademik şura uzv Fəriba Əlasvənd çe Mığoviməti jenon bənə canqi meydonədə fəğət bəyji mandə və ya matəm oqətə jenon ne,həmən bənə fəolə sosyal və dini fəolon iştirok kardey ğənoəti omən.Harçənd mumkine əvon çe hodisəon zəmonədə ıştə rəftoron təsiron və nəticəonku bexəbə bıən,əmmo dınyo mığyosədə mədəni və mənəvi inkişofon bə formə dəşeyədə qıləy rol ifo kardəşone.

Bə Jenon və Xıyzoni Tədğiğoton İnstituti akademik şura uzvi etığodi əsos,Ğəzzə şəhidon moon rəftoron əhəmiyyətinə nəticəonku qıləyni İslamofobiya bəkaməti və dınyoədə bə İslom və Ğıroni handey meyli ziyodəti bıə.Mısılmonə jenon,xususən həm ıştə sə puşniyə jenon simo mığoviməti sahədə qıləy nuyə təsvirış kəsb kardə.In jenon əksərən şəhidəti dayrədə jimonışon kardə;əvon bəzən ıştə hırdənon,bəzən ıştə şuon və ya ıştə bıvonışon və bəzi holonədə həm hətto ıştə dol iyən ruşeymonışon ıştə homiləti zəmonədə çe dasto doəşone.

İminə nəzəku ım vəzyət və ın fociyəon bo har qıləy jeni,xususən həm emosiyonalə formədə vey qon iyən hırdəkəy;əmmo əmə praktikadə vindedəmon ki,ım jenon farğinə reaksiya doydən.Ğıroni ayəon handə holədə və bə imoni peştıpur bıə holədə ğəmo-ğussə bo tovinəti və mubarizəro bə qıləy ğıvvə təbdil kardedən.Hətto çəvon veyni ıştə evlodon şəhidəti təbrik kardedən və ımi boştə iftixori mənbə hisob kardedən.In fenomen nışon doydə ki,"jenon və muharibə" mıxtəlifə aspektonku mıtoliyə bıəninə qıləy veycəhətin iyən nığılə məsələy.

Məsələn,jenon ıştəni çe canqi muhitədə vindeyədə,çəvon iminə reaksiyaon i nev çe jeni tars və panika beydə;beynəlxalğə sənədonədə de "Muharibəonədə və Beynəlxalğə Munağişəonədə Jenon" unvoni ğeyd kardey beydə.Jenonə tars və çe merdon təcrubəku farğinə qıləy hiss.Merdon adətən bənə canqəkə və hucuməkə çiyedən,lakin jenon qıləy farğinə fizioloji və psixoloji vəzyətədən.çımonsə əlovə,inon dıbərobər əzob kəşeydən:əvon həm bəştə vəşyanəti,həmən bəştə hırdənon vəşyanəti eyni zəmonədə tov vardedən.

Joqo qıləy şərayitədə qıləy vocibə çi bə əməl omeydə:ıştə hırdəni qim kardə inə çe "fərdi moəku" bə "milləti inə",bə "ideoloji moə" və ya bə"dini inə " təbdil beydə.Çın jenon kiyəti əvəz beydə;əvon "passivə matəm oqətə kəsonku" bə "mığoviməti mesaji kırnə kəson" peqardedən.Muharibədə iştirok kardə cəmyətonədə səbr və mığoviməti hikoyə qıləy dıjdə hissə eyni inon tərəfiku bə həyot dəvordıney beydə.Yəni,bə canqi dastəqi qıləy dıjdə hissə de inon nomon vositə bə dast omeydə;Əvon bə mığoviməti mədəni və emosiyonalə sutunon peqardedən.

Təbiye ki,canqiku səlomət beşə kəson çe depressiya və psixoloji travmaku əzyət kəşey çəş kardey beydə,ımi ısət israyiliku və ya Amerkə əskəron moon çandə sorone nışon doydən;hətto dınyo muharibəonədə həlok bıə kəson veyni inəon ğeyd kardey bıə ki,ım həm çəvon çe canqiku səlomət beşeyro çanədə zərər vindey nışon doydə;əvon çe qonə depressiyaku əzyət kəşeydən və boştə zehni və psixoloji ixtilolonro çe muolicə dumon.

Lakin Ğəzzə və çe “İroni Mığəddəsə Mudofiyə Moon” təcrubədə vəzyət farğ kardedə.ım dıqlə holonədə,əmə ıştə fərzəndon şəhidəti bədiqə bə hodisə vırə de missiya və mənəvi məsuliyyəti hissi oqardə ziyodə mığdorədə bıə şəhidə moon dimbədim beydəmon.Im inon ıştəni çe şəhidi xuni mesaji rosney məcburiyyətədə hisob kardedən.Bın şikilədə,ım inon ıştən bə qıləy onemoni təbdil beydən.Əvon ıştə rolon çe fərdon inəonku bə milləti moon və bə mığoviməti moon təbdil kardedən.jıqo bızın ki,çe şəhidon xuni boəvon qıləy huğuği şəxsiyyətış kəsb kardə.Əvon ıştəni çe İslom,Ummət və hətto çe bəşəriyyəti vədə məsuliyyətin hiss kardedən.