Avropə kom kişfər jen kışteyədə rekordış heste?

Pars-Tudey-Yurostati “Avropə Statistikə İdorə” nuyə məlumoton nışon doydə ki,bə Avropə İttifoği uzv bıə kişfəron şəhrvandon har i milyon nəfəriku 4.1 qılə jen kıştə beydə.

İştimoyi məsələon eksperton jıqo hisob kardedən ki,Avropə İttifoğədə qıləy zəmon ki,qıləy fərdi ğatil çəy nezə odəmonku bənə jimoni həmro bıbu,çe jenon kıştə bey ehtımol bəsə merdonsə təğribən dı bərobəre.Bə Pars-Tudey doə məlumoti əsos,Yurostati nuyə məlumoton nışon doydə ki,bə Avropə İttifoği uzv bıə kişfəron şəhrvandon har i milyon nəfəriku 401 qılə jen kıştə beydə ki,ın rəğəm bo merdonro 2.2 nəfəre.

Bə Yurostati doə məlumoton əsos,Latviya milodi 2022-ə iyən 2023-ə soron dırozi sabitə formədə,jenon kıştey məsələ çe Avropə İttifoği uzv bıə kişfəron miyono həmməysə barzə səviyyədə bıə.yəni çın kişfəri har i milyon nəfəri mığobilədə təğribən 17 qılə jen kıştə bıən.

Latviya hamsuyə litva kişfər həm bın dıqlə sori bın zəminədə dıminə məğamədə ğərolış qətə.yəni har i milyon nəfəri mığobilədə təğribən 10 qılə jen kıştə bıən və çəy bədiqə makedoniyə kişfəri ğərolış qətə ki,har i milyon nəfəri mığobilədə təğribən 5 qılə jen kıştə bıən.

Maltisə əlovə,bə Avropə İttifoği uzv bıə kişfəron miyono jenon kıştey rəğəm,Yunonıstonədə(milodi 2022-ə  iyən 2023-ə soron dırozi 1.8 qılə jen),İspaniyədə (milodi 2022-ə sori2 qılə jen iyən 2023-ə sori dırozi 2.1 qılə jen) iyən Hollandiyədə(milodi 2022-ə sori 2.4 qılə jen iyən 2023-ə soron dırozi 2.3 qılə jen) ğeyd kardey bıə.

Dəvardə da soron dırozi Avropə İttifoğədə jenon kıştey rəğəm nisbətən sabir mandə iyən çəy pik noxtə 2022-ə sori bıə.qıləy zəmon ki,har i milyon nəfəri mığobilədə təğribən 4.4 jen kıştə bıə.

Co tərəfiku Avropə İttifoğədə fəğət dıqlə kişfər yəni Kipr iyən Malt”jeni kıştey” məsələ bənə qıləy mıstəğilə cinoyəti unvoni bə rəsmiyyətış zınə.