Bə İslomi İnğılobi Mıhofizəon Korpusi ələyh hərəkəti ğətiyyətinə reaksiya

İroni bə Avropa İbemoni bə İslomi İnğılobi Mıhofizəon Korpusi ələyh hərəkəti ğətiyyətinə reaksiya nışoş do.

İroni İslomi Respublikə Xarici Koon Vəzirəti,19 fevral 2026-ə sori bə Avropa İbemoni uzv devləton beğanun və beəsosə ğərori cəvobən doə bəyonotədə elonış kardə:"Bə Avropa İbemoni uzv devləton bənə çı kişfəri rəsmi silohinə ğıvvon sutunonku qıləyni zıney bıə İslomi İnğılobi Mıhofizəon Korpusi bə İbıə Milləton Təşkiloti Nizomnomə və beynəlxalğə həxon fundamental prinsipon və ğaydəon zidd terrorə təşkilot elon kardəşone."

Bəyonotədə İroni İslomi Respublikə hukuməti mutəğobilə prinsipi və 2019-ə sori təsdığ bıə" İslomi İnğılobi Mıhofizəon Korpusi çı AİŞ tərəfiku bənə terrorə təşkiloti elon kardey zidd mutəğobilə tədbiri" ğanuni 7-ə maddə əsosən tədbir vindeyış bəyon kardə.

Bəyonotodə bəyon bıə ki,bə AİŞ-on Sepah bənə terrorə təşkiloti elon kardey ğərori har qıləy şikilədə əməl kardə və ya dastək doə qırd kişfəron bə mutəğobilə hərəkəti məruz bəmandeyn.

İroni Xarici Koon Vəzirəti bəyonotədə bəyon kardey bıə ki,Aİ uzv devləton həmmə dıyo və həvo ğıvvon bə pentono ğeyd kardey bıə ğanuni və bəçəy muddəon,min cumlə həm bə 4-ə maddə tabe bəbe və boçəyro həm İroni İslomi Respublikə əvoni mutəğobilə fəoliyyəti çərçivədə bənə terrorə təşkiloton mıəyyən və elon bəkarde.

Bə Aİ uzv devləton İslomi İnğılobi Mıhofizəon Korpusi terrorə təşkiloti elon kardey ğəror çe İbıə Milləton Təşkiloti Nizomnomə və beynəlxalğə həxon fundamental prinsipon oşkoə şikilədə darıştedə.Bə İbıə Milləton Təşkiloti Nizomnomə muddəon əsosən,devləton bəpe bə kişfəron milli suverenitəti və ərazi təmomiyyəti hurmət bınon və çı diqər kişfəron daxili strukturədə har qıləy mıdoxiləkə hərəkətiku pərhiz bıkon.

Qıləy kişfəri rəsmi silohinə ğıvvon iqlə hissə bənə terroristi təyin kardey,çe həmonə kişfəri hərbi və əmniyyəti suverenitəti bə şubhə ji bardey mənoədəy və beynəlxalğə huğuği nəzəku qıləy beğanunə hərəkət hisob kardey beydə.

İron,bə mutəğobilə prinsipi və bə 2019-ə sori təsdığ kardey bıə ğanuni 7-ə maddə əsosən,bə Aİ-i ələyh hərəkəti ğanuni və mutənosibə cəvob hisob kardeydə.Bə ın ğanuni əsos,AİŞ-on Sepah bənə terroristə təşkiloti elon kardey ğərori himoyə kardə har qıləy kişfər və ya onemon bə mutəğobilə tədbiron məruz bəmande.

Bə İroni konstitusiya əsos,İslomi İnğılobi Mıhofizəon Korpus çe kişfəri rəsmi silohinə ğıvvon sutunonku qıləyniye;əve həm bəçəy ələyh har qıləy mıdoxilə və ya təzyiğ milli mıdofiyə strukturi bəisə hədəf qətey hisob kardey beydə.

İroni İslomi Respublikə bə Avropa İbemoni uzv devləton dıyo iyən həvo ğıvvon bənə terroristə təşkiloti elon kardey hərəkət çe Ğərbi bə kişfəri mıdofiyə sistemi əsosə sutunonku qıləyni zidd dışmenə hərəkət və mıdoxiləkə nəzə,strateji və çandcəhətinə cəvob hisob kardey bəbe.

Siyosi nəzəku ım ğəror bə Ğərbi təzyiği təslim bey nıpiyə İroni mıstəğiləti və xarici siyosətədə nufuzi əloməte.Avropa hərbi təşkiloton terrorist elon kardey praktikada irtərəfinə devlətiku siyosi mıodiləon miyoniku bardey və bə Avropa çəvon hərəkəton becəvob nımandey bəsə dənoey bəzıne.

In ğəror həmçinin çı kişfəri silohinə ğıvvon daxili ibemoni və iştimoyi dastəqi zumand kardedə, çunki milli iştimoiyyət ımi bənə "suverenəti ləyoğəti və təmomiyyəti mıdofiyə kardey"əloməti zıneydən.

İroni bə Avropa hərbi ğıvvon bənə terroristə təşkiloton təyin kardeyədə bıə cəvob reaksiya,bə İroni silohinə ğıvvon ələyh har qıləy təhdid bəçəy mevcudiyyəti və milli suverenəti təhdid hisob kardə İslomi Respublikə əmniyyəti sıə xətti əloməte.Dıjdə strateji səviyyədə ın hərəkət İroni mıdofiyə və əmniyyəti məsələonədə bə har qıləy mıdoxilə cəvob doeyro huğuği və siyosi vositəonku istifodə kardey barədə xəbərdorəti kardedə.