Jenon bə Avropa Miqrasiya Mardəvardə Roon;Maqiku tobə Mıosirə Nokəçəti

Pars Tudey -Beynəlxalğə təşkiloton nuyə hisoboton nışon doydə ki,bə İtaliya de Miyonə dıyo və Balkani marşruton təhlukəninə təkə səyohət kardə jenon sıftənəsə vey çe riski jiyədəy.

2015-2016-ə soronədə bə əməl omə miqrasiya behroni bədiqə"okkuye" məğsədi bə forma dəşə Avropa İbemoni saxtə siyosət əslədə bə əksə nəticəon vardəşe.Ğanuni marşruton məhdud kardey nəyinki miqrasiya cərəyoni navış qətəni,həmən əvış çe insonə ticorəti şəbəkəon,xususən həm jenon ğaçaği səmt sevğış doə.

Bə Pars Tudey doə məlumoti əsos,beynəlxalğə təşkiloton nuyə hisoboton nışon doydə ki,bə Avropa miqrasiya modelon əvəz beydə;Təhlukəninə Miyonə dıyo və Balkani marşruton bə İtaliya təkə səyohət kardə jenon bəsə navnəsə vey çe maq,cinsi hoziyəti və sistematikə istismori riski jiyədəy.

İtaliyadə bıə Beynəlxalğə Xiloskardey Komitə nımoyəndə İrini Kontoqiannis votedə:"Həm Meditaranə dıyo və həmən de Balkani marşruton coyli və mışoyiət nıbə səyohət kardə jenon ədədədə əhəmiyyətinə dərəcədə ziyodəti şoyd bıəmon".Bə Komitə doə məlumoti əsos,2024-ə sori de Balkani marşruti bə İtaliya omə sinnışon bəpe bıə jenon rəğəm de navnə mığoyisədə nisbətən 250% ziyodə bıə,əmmo ım qıləy holədəy ki,aylə miqrasiyaədə cəmi 52% bıə.

Eyni zəmonədə,Beynəlxalğə Miqrasiya Təşkilot 2024-ə sori Avropada de 3419 miqranti maq və ya qim eqıniye anqıl ğeydon bino bıə vaxtiku jıqoşə bo miqrasiyaro həmməysə mardə vardə beyış bəyon kardə.In təhlukəninə marşruton bo jenon cinsi hoziyətiku bə istismori və mutəşəkkilə vızməti əlovə riskon icod kardedə.

Beynəlxalğə Miqrasiya Təşkiloti nımoyəndə Oqoçi Daniels votedə:"Jenon miqrasiya təcrubə farğine və ziyodə vaxti vey təhlukənine.Hətto qrupi holədə səyohət kardə jenon həm dayimi mudofiyəkəşon ni və çı ğaçağçiyon,brokeron və hətto co miqranton tərəfiku bə istismori məruz mandedən."

 Stella Polare nomo de insonə ğaçəği muborizə şəbəkə nımoyəndə bə Hermin Qəbdo sıxanon əsos,qırd miqranton bə ğaçəği şəbəkəon pul doey məcbur kardey həm bıbu,əmmo jenon əksərən çe moliyyə pərdaxtiku əlovə,bə məcburi cinsi əloğə həm məruz mandedən.

Tək nəfərinə miqrasiya ziyodəti çe Avropa marzonədə fəğırəti,noəmni,məhdudəkə siyosət və insoni savdı şəbəkəon ço ro oşkoə mənzərə icod kardedə.In realəti çe miqrasiya və mıhocirəti behroni,har çiyku bənav,jen və zəxminə sıfəti bey və hələm həm qıləy insoni və təsirinə cəvob nıbey nışon doydə.

2024-ə sori mardəvardə statistika nışon doydə ki,miqrasiya həni fəğət qıləy marzi iyən sərhədi problem ni,bəlkəm bo Avroparo bə qıləy struktur və mənəvi behroni təbdil bıə;miqrantə jeni cəsədi çe siyosət, əmniyyət və insonə ticorəti siyoə ixtisodiyyoti miyono bə təmasi xətti peqardə və bə ın həyğəti dığğət nıkardey,ha sor həni həm vey qon bıə və bə insoni tələfoti səbəb bıə qıləy behron bəbe.