Suriyə şimalədə Tırkiyə hərbi əməliyaton bino bıə.

Tırkiyə mudafiyə vəzir Suriyə şimalədə bıə Əfrin məntəğədə çı tırkon kişvəri hərbi əməliyaton bino beyku xəbəş do.

Bə İsna raporti əsos çı Skay Niyuz nəğliku Tırkiyə mudafiyə vəzir Nuroddin Canikli elanış kardə Suriyə şimalədə bıə Əfrin məntəğədə Tırkiyə hərbi əməliyaton bino bıə ijən qədə-qədə bə ım məntəğə hevujə həmləon bino bəbe.

Tırkiyə mudafiyə vəzir əlovəş kardə: bə Tırkiyə zidd əmniyətiyə təhdidon ziyod bey hoədəy iyən Ankara dıvlət bo Əfrin məntəğədə ehtimaliyə zərər-ziyanon kam kardero de muxtəlif nufuzinə kişvəron muzakirə karde holədəy.

Im qıləy vəziyətədəy ki bə Suriyə Xalğ Mudafiyə Kırdə nimə hərbiyon elani əsos zinə şəviku bə Suriyə şimalədə bıə Əfrin məntəğə çı Tırkiyə rəketiyə hucumon bino bıə.

Çimiku bənav Tırkiyə prezident çın məntəğədə bıə kırdonku tələbış kardə ki təslim bıbun.

Miladi 2016 nə sori Avqusti 24 nə rujiku Furati sipər nomo bıə əməliyat Suriyə şimalədə bino bıə.

Tırkiyə elanış karde ki de həminə əməliyati Suriyə şimalədə iyən 5 həzo kilometr çı Suriyə sərhəddiyə zəmini baxşonədə əmnə məntəğə icod karde ğəsdış heste.