"Oqarde həxi" 22 minə cumə rujədə Fələstinıjon aksiya.
Oqarde həxi 22 minə cumə rujədə ki "bə mediya və tibbi qrupon bəfodor mande cumə" nom noə bəy, zinə Ğəzzə tanqə marzonədə, bo ım məntəğə mıhosirə arşiye bərpo bıə.
Bə İrna raporti əsos, "Oqarde həxi" aksiya və Ğəzzə tanqə mıhosirə ləğv karde milliyə kamissia de bəyoniyə tibbi kadron və mıxbıron roli ğədrdonəti karde xoto ki bə aksiyaəkəyon komək kardedən və de İsraili cinoyətkorə rejimi muğabilə kardey ım rejimi cinoyəton oşko kardey royədə təşəkurış kardə və təkidış kardə ki sionist rejimi yolon bəpe canqiyə cinoyəton xoto cəzo bıbun.
"Oqarde həxi" aksiya və Ğəzzə tanqə mıhosirə ləğv karde milliyə kamissia, ım bəyoniyədə işorəş karde ki Fələstini milləti ıştə oşko həxi əcumlə Ğəzzəku hərcurnə mıhosirə məhv karde və bə Fələstini milləti muxtəlifə roonku təcavuzi bə oxo rosniye xoto, hiç sazış nibəkarde və bə oqarde həxi aksiya dəvomi təkid kardedə ijən beynəl xalğiyə təşkilotonku tələbış kardə bə ıştə rolışi Fələstini milləti həxədə sionist rejimi cinoyəton vədə mane bıbun.
Marti 30ku həmzəman de zəmin ruji soqardış Ğəzzə və işğaliyə sərzəminon mərziyə məntəğədə Oqardey həxi de Fələstinıjon şəhrvandon huzurışon bərpo bıə, ım reaksiya de ım niyyət bərpo be ki Fələstinıjon avarəon oqardey həxi bıən, Ğəzzə tanqə mıhosirə ləğvış bıbu.
Fələstini səhiyə vəzarətxonə elan kardə: ta ım zəmon ım reaksiyaədə 176 Fələstinıjon şəhrvand şəhid və veyni bə 18 həzo nəfər zəxmin bıən ki şəhidonku 27 nəfər hırdən, 3 nəfər jen hestən.
