Bəğayi:Milli hakimiyyət bə xarici təcovuzi ələyh yeqanə maneəy

Pars Tudey-İroni Xarici Koon Vəzirəti sıxanəvoti elonış kardə:Milli hakimiyyət de qırd komponenton bə ico bə xarici təcovuzi yeqanə təsirinə maneəy.

Pars Tudey bə Mehr Xəbə Aqentəti istinodən doə məlumoti əsos,İroni Xarici Koon Vəzirəti sıxanəvot İsmoyl Bəğayi sosyal şəbəkəonku qıləyniyədə de Mıttəfiğə hərbi ğıvvon Həşi 1320-ə sori bə İroni hucum və 6 sor dəvom kardə və bə İroni dıjdə tələfot iyən zərər doə İroni işğali sorəqardışi mınosibəti bıə qıləy mesajış pevolo kardə və nıvıştəşe:Imruj,3 şəhrivər,vironəkə muhoribədə iştirok kardə tərəfon bə İroni hucumi 85-ə sorəqardışe.3 şəhrivər Həşi 1320-ə sori maştəvoni,yəni cəmi 85 sor bənav,çəmə vətən Dınyo Mıhoribədə iştirok kardə kişfəron hərbi ğıvvon tərəfiku si sorisə kamə mıddətədə dıminə dəfə de komilə ğəddorəti işğal kardey be;Məhəmməd Rıza Pəhləvi peşo xəcolət vardə şikilədə "de zu məntıği qıləy dınyoədə"- "telı neytraləti ğəfəsi" illuziya nom noə bıə imperiya bə hukuməti rəsmi neytraləti eloni rəğmən,bın holədə Səvet İttifoği bə İroni çe şimol və şərğiku,Britaniya həm çe cənub və ğərbiku,zəmin və həvoku hucumışon karde;İroni imperiya ləşkər çandə ruji ərzədə vırto-volo be,muhimmə şəhron bə dast vardey be,qırd İron işğal kardey be və çe kişfəri şah çe xarici ğıvvon işğaliku cəmi 22 ruj bədiqə mığovimət nışon nıdoə holəd çe taxtiku eqıne və bə Hindi okeyani diyəroə vırə,bə Britaniya koloniyaonku qıləyni rısvoyçiyə şikilədə dərbədər kardey be.