Yəməni Səhiyyə vəzir: 2 milyon hırdən Yəmənədə yavə hardımoni vəziyətdən.

Yəməni Səhiyyə vəzir bə ım kişvər zidd təcavuzkorə kişvəron həmləon bə oxo rəsey lozim bey təkid və elanış kardə: çı Yəməni 5 milyon hırdənonku 2 milyon yavə hardımon iyən vey bevəc xorək hardeku dard kəşdən.

Bə Əlməsirə televeziya kanali zinə ruji raporti əsos, Yəməni səhiyyə vəzir Taha Əlmotəvəkel, Həccədə səhiyyə mərkəzoniku vindemon karde və noxəşə hırdənon mıoyinə kardey cərəyonədə votışe: ım insoniyə fociədə bə yəmən təcavuzkorə kişvəron məsuliyətşone.

Yəməni səhiyyə vəzir Yəmənıjə hırdənon, merdon və jenon marde əsliyə illəti bə ım məzlimə kişvər dəvo-damon varid nıbey elamanış karde və əlovəş do: səhiyyə vəzarətxonə cəhd bəkay ki anədə ki karde bızono de mıolicə mərkəzon icod ke bə noxəşə hırdənon komək bıkə əmmo ım ko bə Səənaa airporti oj karde ijən bə Yəməni milləti zidd həmləon sə karde vabəstəy.

İ Bıə Milləti Hırdənon Fond(Yunisef) həm dəvardə haftə qıləy raportədə elanış kardə təğribən 400 həzo çı Yəməni hırdənon şiddətinə yavə hardımoniku dard kəşedən.

Ərəbiston de İ Bıə Ərəbon Əmirəti, Amerkə və sionist rejim iyən bəzi co mıttəhıdon 2015-nə sori Martiku bə Yəmən hərbi təcovuzi bino ijən ım kişvəri çı zəmin, osmon və dınyoku mıhosirə kardəşone.

Bə yəmənı zidd Ərəbıston və İ bə ərəbə əmirəti iyən çəvon şərikon canq desbə ısət 14 həzo nəfəriku vey yəmənıji şəhodət və çand da həzo nəfəri yarəjə bey iyən çandə milyon nəfəri avərəti bois bə.