Taleh Bağırzadə zoon barədə cinoyət ko bə məhkəmə vığandə bə

Mısılmon İbemon Hərokati sərdor Taleh Bağırzadə zoon Məhəmmədhəsən və Məhəmmədhuseyn Bağırzadon barədə bardə ibtidai istintoğ bə orəx rəsə.

Cinoyət ko bə məhkəmə vığandə be barədə huğuğ mıdofiəkə Arzu Abdulla ıştə “Facebook” səhifədə nıvıştəşe.Nıvıştəyədə, iyuli 17-də əvlodon de mıstəntığe sə qətə vindemonədə bəvon istintağe bə orəx rəse və ko bə məhkəmə vığande votə bə.Məhəmmədhəsən Bağırzadə de Cinoyət Məcəllə 127.2.3 və 221.2.1-minə, Məhəmmədhuseyn Bağırzadə de 221.2.1-minə maddon ittihom kardə bedən.Məlumotədə, tərəfon miyon dustiyəti be səmtədə təşəbbus nuşu doə bıboən, vəynə tərəfi ımış ğəbul kardə ni, koy huğuği mustəviədə dəvom karde ğəror doəşe.Hadisə ım sori aprelə manqi 7-də Boku Buzovna ğəsəbə 26 numrəninə məktəbi soədə səş qətə.De doə məlumoti, hese-bes penə sinifi əğlonədə qıley tərəfo naloyiğə sıxanon voteku bino b və bə dave peqardə.Məhəmmədhəsən Bağırzadə ıştə boə dı xonəxo tərəfo kue vinde bədiqə bə dave mıdaxilə kardəşe. Hadisə nəticədə vəynə tərəfiku i kəsi vıni arşiye votə bıboən, əvlodon ın xəbə pesoxtə be bəyon kardedən.Əvon hisob kardən ki, ın hadisə oxonə faxton bə dindoron kardə təzyiğon fonəda konkret bə Taleh Bağırzadə və bə əçey xeyzoni vəynə təhdidon i tikəye.Mısılmon İbemon Hərokati sərdori Taleh Bağırzadə holiədə dastqirətiəde. Əv, 2017-minə sori de curə-bəcurə pesoxtə ittihomon 20 sor ozodətiku məhrum kardə bə.