Ğəzzədə bıə cinoyəton barədə Tırkiyə beynəl xalğ iştimaeiyəti tənğidış karde.

Tırkiyə xarıci vəzarətxonə qıləy bəyoniyə vositə Ğəzzə tanqədə sionist rejimi tojə bombardemoni nəticəku ğeyri hərbion kışte barədə çı beynəl xalğ iştimaeiyəti sukuti tənğidış kardə.

Bə Anatoli aqentiyəti raporti əsos, ım bəyoniyədə ki seşənbə ruji muntəşir be, Ğəzzə tanqə vəzyətiku Tırkiyə ıştə niqəroni nışoş do və elanış karde, Ankara çı dınyo iştimaeiyətiku tələb bəkay ki ğeyri hərbioni coni nicot bıdən ta ım tanqədə dəhşətinə innsoniyə fociə icod bey vəy qətə bıbu.

Çimiku bənav həm Tırkiyə prezident sıxənəvot dınyo kişvəronku tələbış kardə be, bə Ğəzzə tanqə milləti zidd sionistiyə rejimi həmləon və cinoyəton oxo doe xoto ciddi tədbiron dəvoniye bıbu.

Im mıvzo barədə Fələstini mıstəği muxtar təşkilati xarıci vəzir Riyaz Maleki həm tojədən Ğəzzədə bə ğeyri hərbioni əleyh sioniston cinoyəton barədə təhğiğ karde xoto İ Bıə Milləton Təşkilati Əmniyyət Şura zəruriyə iclosi dəvoniye tələbış kardə.

Ğəzzə tanqədə sionist rejimi yekşənbə şəviku bino bıə həmləon, veyni dınyo kişvəron niqəroni bois bıə.

Fələstin muğavımət qurupon həm de tosə bə ısət ım rejimi təcavuzi reaksiyaədə 500 qılə rəketi bə Ğəzzə tanqə nezi bıə sionist ənıştə vırəon ğandəçone ki 2 nəfər sioniston həlokış karde iyən bə 50 nəfər nezi zəxmin bey bois bıə.

Fələstin muğavımət qurupon ım zumandə reaksia barədə İroni İslamiyə Şura Məclesi rəisi məxsusə məsləhətçi Huseyn Əmirəbdollahiyan elanış kardə ki: həmlə peşo fəror karde zəmon ni, bo sioniston şərayet əvəz bəy.

Sioniston həmlə nəticəku xəbə omə ki Əl-Əğsa telekanali bina iyən vırə həm xərob bıə.