Fələstinıjəon İroniku ğədrdonəti kardeşone.

"Oqardey Həxi" yolə aksiya bərpoəkə aliyə heyət zinə qıləy bəyoniyədə ki Ğəzzə tanqədə ım aksiya bərpo bey cərəyonədə handə bəy Fələstini millət və araziku himoyədorəti karde xoto İroni dıvlət və millətiku ğədrdonəti kardeşone.

Bə İrna raporti əsos, "Oqardey Həxi" yolə aksiya bərpoəkə aliyə heyət ım bəyoniyədə təsdiğış kardə ım aksiya detosə bə çəy həmmə hədəfon dast peydo karde dəvom kardedə.

"Oqardey Həxi" yolə aksiya bərpoəkə aliyə heyət ijən de İsraili rabitə normal karde xoto məntəğə bəzi ərəbə rejimon səy-cəhdon məhkum və təkid kardeşone de sionist rejimi rabitə normal karde bə Fələstin milləti xəyonət karde mənodəy.

Həzo-həzo Fələstinıjəon zinə cımə Ğəzzə tanqədə bıə 36 minədə "Oqardey Həxi" sulhpərvərə aksiya ki " de Fələstin milləti beynəl xalğiyə vəhdət" onvani bərpo be iştirokışon karde.

Im aksiyaədə 28 nəfər Fələstinıj de sioniston qullə vositə zəxmin bıən.

Marti 30ku həmzəmon De zəmin Ruji sorqardış Ğəzzə və işğaliyə sərzəminon mərziyə məntəğəonədə Oqardey Həxi aksiya bino be ki ım aksiyaədə ta ım zəmon 247 nəfər Fələstinıj de sionist rejimi hərbion həmlə vositə şəhid iyən 25 həzo nəfəriku vey zəxmin bıənş

Kali məmləkəton mincumlə İron İslam Respublika iyən beynəlxalğə təşkilaton desbə ısət sioniston ım cinayəti məhkum kardəşone.

Zəmin ruji sorəqardışədə fələstinıjon aksiya 1976 nə sori martə manqi 30 minnə ruji fələstinıjon ərazi musadirə karde barədə sionist rejimi ğəroli bə yod vardə ki ha sor bərpo bedə.

sionist rejim de fələstinıjon ərazi musadirə karde və sionist ənıştə məntəğon soxte fələstin ərazi cuğrafiyaiyə structuri əvəz karde və bə ım məntəğon siyonistiyə obrazi doe niyyətdəy ta fələstiniyə əraziədə ıştə təcavuz irən sultə idomə bıdə.