Dəməşğədə Cəhanqiri və Bəşar Əsədi vindemon.

Dəməşğədə İroni prezidenti i minə muavin və Suriyə prezident de yande vindemon iyən 2 qılə kişvəri miyono əloğəon inkişof doe barədə sohbətışon karde.

Bə İrna raporti əsos Eshağ Cəhanqiri zinə de Bəşar Əsəd vindemon karde votışe: Tehran-Dəməşği miyono iğtisodi və ticari stratejik əloğəon muğavilə imzo karde bə həmkarion komək bəkay.

İroni prezidenti i minə muavin ijən bə İron və Suriyə miyono nığlə əloğəon və dustiyəti rişəon işorəş karde və votışe: Tehron və Dəməşğ saxtə şərayetədə yandə kənoədə bin və ımruj həm bo bohranon həl karde iyən inkişofiro yande kənoədə bemandən.

Cəhanqiri terrorçiyon vədə Suriyə səbarzətionış bə təğdiri loyiğ zınəş be və təkidış ka: əqə məntəğədə İŞİD-i mərkəz və dıvlət təşkil bıə be ğərbədə terrorist anədə hevoj əbey ki represiv hərəkəton iyən terrori bə har ruj mışohidə kəmon.

Suriyə prezident Bəşar Əsəd həm əv vindemonədə xarıci mıdoxiləon iyən de terrorizm mubarizə barde zəmonədə çı İroni Yolə Rəhbər, millət və dıvləti koməkonku təşəkorış karde və votışe: Suriyə kamilən ozod karde vaxtədə çəmə vey muhimmə ko kişvəri əv bədon karde heste ki əmə ım baxşədə həm İroni huzur və koməki çəş kardedəmon.

İroni prezidenti i minə muavin Eshağ Cəhanqiri de Yolə iğtisodi və ticari heyəti 3 ruj çımiku bənav Suriyə və İroni əloğəon 14 minə mıştərəkə kamissiyadə iştirok karde xoto bə Suriyə varid be.

Əv ım səfərədə de Suriyə xarıci vəzir və Suriyə məclesi sədr həm vindemonış karde.