Ğuds beynəl xalğ ruji aksiyaədə mısılmonon əzəmətinə iştiroki zəruriyyat.

Məşhədədə Əfğanıstoni Tebyan mədəniyə mərkəzi yol Seyed İsa Huseini Məzari bə ımsornə sori Ğuds beynəl xalğə ruji yolə aksiyaədə Əfğanıstonıjon əzəmətinə iştiroki işorəş karde və votışe: millət mubarək rujə manqi oxonə cumə rujədə de Amerkə və sionist rejim bemardo şuari ıştə nifrət iyən xışmi Ğudsədə sioniston cinoyət və Amerkə siyasətonku elan bəkan.

Əv İroni inğilabi təsisəkə mərhum İmom Xomeyni(r) çı islam dınyo yolə alim və qlobal şəxsiyət zınəş be ki deştə tədbiri Ğuds beynəl xalğə ruji tarixədə təsdiğış karde.

Əfğanıstoni tebyan mədəniyə mərkəzi yol sionist rejimi nə Fələstin bəlkəm məntəğə kişvəron hətto Əfğanıstonədə noəmnə vəzyəti icodəkə amil elanış karde.

Tehroni zinə ruji cumə nımoji xətib Ayətullah Movəhhedi Kermani həm ıştə xotbəonədə Ğuds beynəl xalğ ruji çı islamiyə umməti iradə və vəhdəton simvol zınəş be ki cəmaət, Fələstin məzlumə millətiku himoyədorəti karde kənoədə çı mısılmonon i minə ğebləku mudafiə bəkan.

İslamiyə təbliğon həmohənqəkə şura Ğuds və intifazə ğərorqo qeneral Rəmezan Şərif həm tojədən ım haftə cumə ruji astanədə bə Ğuds beynəl xalğə ruji əhəmiyyət işorəş karde və votışe: Tramp de ğərni muğavilə Fələstin milləti ozod və hədəfi məhv karde pidəşe.